موسیقار امجد بوبی کی 9 ویں برسی 15 اپریل کو منائی جائیگی

1976ء میں ’’راجہ جانی‘‘سے کیرئیر کا آغاز کیا،فلم ’’بوبی‘‘ سے شہرت حاصل ہوئی۔ فوٹو :فائل

---

نامور موسیقار امجد بوبی کی 9 ویں برسی 15 اپریل کو منائی جائیگی ۔

امجد بوبی نے بطور موسیقار فلم ''بوبی '' سے ملک گیر شہرت حاصل کی جب کہ ان کی پہلی فلم 1976 میں ریلیز ہونے والی ہدایتکار ایس اے حافظ کی ''راجہ جانی'' تھی۔ اس فلم کے بعد انھوں نے ''آنسو اور شعلے '' ، ''پرورش'' ، ''آتش'' اور ''آگ اور شعلے '' جیسی فلموں کا میوزک ترتیب دیا ۔امجد بوبی ہدایتکار نذر شباب کے فیورٹ موسیقار رہے ۔

ان کی فلم ''کبھی الوداع نہ کہنا '' ، ''بوبی ''، ''نادیہ '' جیسی فلموں کا میوزک ترتیب دیکر اپنی ساخت مضبوط کی ۔ امجد بوبی نے مہدی حسن ، مہناز ، ناہید اختر ، سلمی آغا ، غلام عباس ، اے نیئر ، تحسین جاوید ، حمیرا چنا ، سائرہ نسیم ، وارث بیگ ، راشد محمود ، شبنم مجید ، فریحہ پرویز سمیت دیگر سنگرز سے ان کی زندگی کے بہترین گیت ریکارڈکروائے۔ ان کی آخری ریلیز ہونے والی فلم ہدایتکار واداکار جاوید شیخ کی''کھلے آسمان کے نیچے'' تھی۔امجدبوبی 15 اپریل 2005ء کو 62برس کی عمر میں دل کے دورے سے وفات پاگئے تھے۔