بلوچستان صوبائی وزیر کی نجی جیل میں قید خاتون و بیٹوں کی لاشیں کنویں سے برآمد

شہری رپورٹ آنے تک افواہوں پر کان نہ دھریں، ترجمان پولیس (فوٹو فائل)

---

بلوچستان میں مبینہ طور پر صوبائی وزیر کی نجی جیل میں قید خاتون اور اس کے 2 بیٹوں کی لاشیں کنویں سے برآمد ہوئیں۔ مقتولین کے لواحقین نے الزام عائد کیا ہے کہ وہ کئی برس سے بلوچستان کے وزیر تعمیرات و مواصلات عبدالرحمان کھیتران کی نجی جیل میں قید تھے۔

پولیس کے مطابق تینوں لاشیں کنویں سے برآمد ہوئی ہیں، جنہیں سر میں گولیاں مار کر قتل کیا گیا تھا۔ تینوں لاشوں کو بارکھان سے ضلع کوہلو منتقل کیا گیا، جہاں عید گاہ میں ان کی نمازہ جنازہ ادا کردی گئی، جس میں ہزاروں افراد نے شرکت کی۔ بعد ازاں تینوں لاشیں کوئٹہ روانہ کی گئی ہیں جہاں مری قبائل کی جانب سے وزیراعلیٰ ہاؤس کے سامنے میتوں کے ساتھ دھرنا دینے کا اعلان کیا گیا ہے۔

 

سردار عبدالرحمان کھیتران کی ظلم و جبر کے شکار ہونے والے بلوچ خان محمد مری کی اہلیہ اور دو جوان بیٹوں کی لاشیں انصاف کے لیے کوئٹہ روانہ#بارکھان pic.twitter.com/ieP4C4kP03

- Bahot باہوٹ (@Bahot_Baluch) February 21, 2023

پولیس کا کہنا ہے کہ کنویں سے نکلنے والی لاشوں کے ہاتھ پاؤں رسیوں سے بندھے اور آنکھوں پر پٹی بھی بندھی ہوئی تھی، تاہم مقتول خاتون کا چہرہ بری طرح مسخ تھا۔ اس سلسلے میں ابتدائی طور پر یہ نہیں بتایا جا سکتا کہ خاتون کے چہرے پر کوئی بھاری چیز ماری گئی یا تیزاب پھینکا گیا۔ تینوں لاشوں کی تاحال شناخت نہیں ہو سکی۔

دوسری جانب بلوچستان کے ضلع دکی کے رہائشی خان محمد مری نے دعویٰ کیا ہے کہ تینوں لاشیں اس کی اہلیہ 40 سالہ گرناز، 22 سالہ بیٹے محمد نواز اور 15 سالہ بیٹے عبدالقادر کی ہیں، جو گزشتہ چار برس سے صوبائی وزیر سردار عبدالرحمن کیتھران کی نجی جیل میں قید تھے۔ خان محمد مری کے مطابق ان کی اہلیہ اور بچوں پر بدترین ظلم کے ساتھ بھوکا پیاسا بھی رکھا جاتا تھا جب کہ ان کی 14 سالہ بیٹی اور 5 سے 13 برس کے 4 بیٹے اب بھی صوبائی وزیر کی نجی جیل میں قید ہیں جن کی زندگی کو بھی خطرات لاحق ہیں۔

باپ پارٹی کے ترجمان اور صوبائی وزیر عبدالرحمن کھیتران نے نجی جیل کا قائم کر رکھا ھے خان محمد مری کی اہلیہ سمیت کئ عورتوں کو قید کر رکھا ھے حکومت بلوچستان اور وفاقی حکومت مکمل خاموش ھے انسانی حقوق کی تنظیموں سے گزارش ھے کہ آواز بلند کرے @SaleemFarrukh @HamidMirPAK @abbasnasir59 pic.twitter.com/Q6enOjPZ59

- Maj ® Khurram Hameed Rokhri (@MajorrrrSSO11) December 29, 2022

واضح رہے کہ سوشل میڈیا پر ایک ویڈیو بھی سامنے آئی تھی، جس میں خاتون نے دعویٰ کیا تھا کہ وہ سردار عبدالرحمن کھیتران کی قید میں ہے، جہاں سردار عبدالرحمن کھیتران ان کی بیٹی کے ساتھ زیادتی کرتا ہے۔ ان کے بیٹے بھی اس کی قید میں ہے، خاتون نے اپیل کی تھی کہ اسے آزاد کرایا جائے۔

سردار عبرلرحمان کیتھران چونیں مردمے ءُ چے کنگءَ انت۔؟ اگاں وتی علاقہ ئے توکءَ اے وڑا دگرانی جنیں زالاں بارت ءُ وتی سیکس slave جوڑ کنت اے دگے مردم چیا ھاموش انت؟؟ اشی سرا علاقہ ءُ راہشون سوچ ءُ فگر بکن آں۔ pic.twitter.com/HczXHYv0my

- Shepank (@Shepank_Baloch) February 8, 2023

دریں اثنا جماعت اسلامی کے سینیٹر مشتاق احمد نے بھی ایوان میں اظہار خیال کرتے ہوئے اس معاملے پر کارروائی کرتے ہوئے خاتون اور بچوں کو بازیاب کرانے کا مطالبہ کیا تھا۔گزشتہ شب کنویں سے تین لاشیں برآمد ہونے پر سینیٹر مشتاق احمد نے اپنے ٹوئٹر بیان میں کہا کہ یہ خون پوری ریاست کے ذمے ہے۔ انہوں نے کہا کہ میں نے سوشل میڈیا اور سینیٹ کے پلیٹ فارم سے کوشش کی لیکن عبدالرحمن کھیتران کی جیل سے کسی نے انہیں رہائی دلانے کی کوشش نہیں کی۔

یہ بھی پڑھیے: بلوچستان کی نجی جیل میں قید شہری کے بیوی بچوں کو بازیاب کروایا جائے، سینیٹر مشتاق

دوسری جانب بلوچستان کے وزیر سردار عبدالرحمن کھیتران نے الزامات کی تردید کردی ہے۔ انہوں نے کہا کہ الیکشن قریب آتے ہی ان کے خلاف ایسے الزامات پہلے بھی عائد کیے جاتے ہیں۔

آئی جی پولیس نے بارکھان میں کنویں سے تین لاشوں کی برآمدگی پر رپورٹ طلب کرلی ہے۔ ترجمان پولیس کے مطابق واقعے میں ملوث افراد کو کوئی رعایت نہیں دی جائے گی، تاہم شہری افواہوں پر توجہ نہ دیں اور رپورٹ آنے کا انتظار کریں۔ ترجمان نے کہا کہ ملوث ملزمان کو انصاف کے کٹہرے میں لایا جائے گا۔

پولیس ترجمان کے مطابق بارکھان سے لاشوں کی برآمدگی کے معاملے پر اہلخانہ کی مشاورت سے غیر جانبدار تحقیقاتی کمیٹی تشکیل دی جائے گی۔