امریکی صدر کی طیارے سے گرنے کی ویڈیو کی حقیقت سامنے آگئی

امریکی صدر کے طیارے کی سیڑھی سے کسی کے نیچے لڑھکتے ہوئے گرنے کی ویڈیو وائرل ہوگئی

ویب ڈیسک February 22, 2023

امریکی صدر اٹلانٹا میں بھی جہاز کی سیڑھیاں چلتے ہوئے گر گئے تھے، فوٹو: فائل

امریکی صدر جوبائیڈن کا طیارہ پولینڈ پہنچا تو مہمانان گرامی باہر آئے لیکن ان میں سے ایک پاؤں پھسلنے کی وجہ سے پہلی سیڑھی سے لڑھکتے ہوئے زمین پر آگرے جس کی ویڈیو وائرل ہوگئی۔

عالمی خبر رساں ادارے کے مطابق امریکی صدر جوبائیڈن یوکرین کا دورہ مکمل کرنے کے بعد پولینڈ پہنچے۔ وارسا ایئرپورٹ پر ان کا طیارہ لینڈ ہوا اور دروازے سے وفد باہر آیا۔ اچانک پہلی سیڑھی سے لڑھکتے لڑھکتے ایک شخص زمین پر آ گرا۔

یہ منظر کیمرے میں محفوظ ہوگیا اور دیکھتے ہی دیکھتے یہ ویڈیو سوشل میڈیا پر وائرل ہوگئی۔ اکثر صارفین نے دعوے سے کہا کہ گرنے والا شخص کوئی اور نہیں بلکہ امریکی صدر ہیں۔

Someone appears to have fallen out of Air Force One.

What are the chances it was Joe Biden?pic.twitter.com/Y7HWvB1olN
— Collin Rugg (@CollinRugg) February 21, 2023

صارفین کا کہنا تھا کہ جس طرح سیکیورٹی اہلکار گرنے والے شخص کو اُٹھانے کے لیے لپکے تھے اس سے صاف اندازہ ہوتا ہے کہ وہ کوئی اہم ترین شخصیت تھے جو امریکی صدر ہی ہوسکتے ہیں۔

صارفین کے اس دعوے کو اس لیے بھی تقویت ملی کہ 80 سالہ جوبائیڈن اس سے قبل اٹلانٹا جاتے ہوئے طیارے کی سیڑھیاں چڑھتے ہوئے کنٹرول کھو بیٹھے تھے اور گر گئے تھے۔

تاہم بین الاقوامی میڈیا نے اس ویڈیو کی حقیقت سے پردہ اُٹھاتے ہوئے بتایا کہ طیارہ امریکی صدر کا ہی ہے لیکن گرنے والی شخصیت امریکی صدر نہیں بلکہ ان کے وفد میں شامل ایک رکن ہیں۔