زمینداروں نے احتجاجاً کئی مقامات پر کوئٹہ کراچی شاہراہ بلاک کردی

زمیندار ایکشن کمیٹی نے مطالبات کے حق میں احتجاج کرتے ہوئے کئی مقامات پر کوئٹہ کراچی شاہراہ کو بلاک کردیا۔

ایکسپریس نیوز کے مطابق کوئٹہ، سندھ قومی شاہراہ کو دشت کے مقام پر زمینداروں نے رکاوٹیں کھڑی کر کے ٹریفک کے لیے بند کردیا جب کہ زمینداروں نے کوئٹہ کراچی اور کوئٹہ تفتان قومی شاہراہ کو لکپاس کے مقام پر بھی بلاک کردیا۔


اسی طرح مظاہرین نے قلعہ سیف اللہ میں کوئٹہ ژوب نیشنل ہائی کو بھی بلاک کردیا۔ زمینداروں نے بجلی کی لوڈ شیڈنگ کے خلاف دھرنا دے کر ہر قسم کے ٹریفک کو جانے سے روک دیا۔

زمیندار ایکشن کمیٹی کا کہنا ہے کہ بلوچستان کے زمینداروں کے ساتھ ہمیشہ سوتیلی ماں کا سلوک روا رکھا گیا، مطالبات تسلیم نہ کیے گئے تو احتجاج کو مزید وسعت دیں گے، ہمارے مطالبات میں بجلی کی لوڈ شیڈنگ، مون سون بارشوں سے ہونے والے نقصانات کے ازالے اور دیگر مطالبات شامل ہیں۔