گھر کو بم سے اُڑانے کی دھمکی شاہ رُخ خان کے بنگلے میں دو نامعلوم افراد گُھس آئے

(فائل فوٹو)

---

بالی ووڈ کے کنگ شاہ رُخ خان کے گھر میں دو نامعلوم افراد نے دیوار پھیلانگ کر گھسنے کی کوشش کی ہے۔

بھارتی میڈیا رپورٹ کے مطابق ممبئی پولیس نے شاہ رُخ خان کے گھر میں گھسنے کی کوشش کرنے والے 2 نامعلوم نوجوانوں کو گرفتار کر لیا ہے۔

بھارتی میڈیا کا کہنا ہے کہ جب ملزمان 'منت ' کے کمپاؤنڈ میں دیوار پھیلانگ کر کودے اس وقت شاہ رخ خان فلم جوان کی شوٹنگ کیلئے گھر سے باہر تھے رات کو شا رُخ گھر واپس لوٹے اور سوگئے جس کے بعد منت کے سیکیورٹی عملے نے احاطے میں چھپے دونوں ملزمان کو پکڑ لیا اور پولیس کے حوالے کر دیا۔

پولیس کے مطابق ان دونوں ملزمان کا تعلق گجرات سے ہے جبکہ ان کی عمر 19 اور 20 سال ہے۔

تفتیش کے دوران ملزمان نے بتایا کہ وہ شاہ رُخ خان کے مداح ہیں اور ان سے ملنے کیلئے گھر میں گھسنے کی کوشش کر رہے تھے تاہم پولیس کا کہنا ہے کہ ملزمان سے تفتیش کی جارہی ہے فلوقت گھر میں گھسنے سے متعلق ان کے مقصد کے بارے میں کچھ نہیں کہا جا سکتا۔

پولیس نے دونوں افراد کو حراست میں لے کرکنگ خان کے بنگلے میں گھسنے کے الزام میں مختلف دفعات کے تحت مقدمہ درج کر لیا ہے۔

یہ بھی پڑھیں: بھارتی پولیس کو امیتابھ، امبانی اور دھرمندر کے بنگلوں کو بم سے اُڑانے کی دھمکی آمیز کال موصول

یاد رہے کہ گزشتہ دِنوں یہ خبر بھی سامنے آئی تھی کہ نامعلوم شخص نے پولیس کو فون کر پر اطلاع دی تھی کہ وہ امیتابھ بچن، دھرمندر اور بزنس مین مکیش امبانی کے بنگلوں کو بم سے اُڑانے والے ہیں اور اس کیلئے اُس نے 25 افراد پر مشتمل گینگ کو ممبئی روانہ کر دیا ہے۔

یہ بھی پڑھیں: شاہ رخ خان کی اہلیہ گوری خان کے خلاف ایف آئی آر درج

بالی ووڈ کے بڑے اداکاروں کے گھروں کو بم سے اُڑانے کی دھمکی کے بعد شاہ رُخ خان کے گھر میں 2 نامعلوم افراد کے گھسنے پر بھارتیوں کی جانب سے تشویش کا اظہار کیا جارہا ہے۔