ٹریفک حادثات اور دیگر واقعات میں 9 افراد ہلاک 3 زخمی

بفرزون میں کار اور موٹر سائیکل میں تصادم کے نتیجے میں 2 افراد ہلاک ہوگئے۔ فوٹو: فائل

---

شہر کے مختلف علاقوں میں ٹریفک حادثات اور دیگر واقعات میں9 افراد ہلاک اور خاتون سمیت 3 زخمی ہوگئے۔

سعید آباد کے علاقے بلدیہ ٹاؤن نمبر9 سیکٹر14میں گھر کے زیر زمین پانی کے ٹینک میں گر5سالہ کمسن ایمان دختر عدنان ہلاک ہوگئی، متوفیہ کی لاش سول اسپتال لائی گئی ، متوفیہ کے اہلخانہ لاش پولیس کارروائی کے بغیر اپنے ہمراہ لے گئے ، پولیس کے مطابق کمسن بچی ایمان کے ورثا نے کسی بھی قسم کی کارروائی کرانے سے انکار کر دیا، بلدیہ ٹاؤن نمبر 3 میں گھر کی چھت سے پر اسرار طور پر گر کر4 سالہ حامد ولد عرفان جاں بحق ہوگیا،متوفی کی لاش عباسی شہید اسپتال لائی گئی ، بلدیہ ٹاؤن کے علاقے رئیس گوٹھ میں گھر میں کام کے دوران کرنٹ لگنے سے28سالہ ناصر ولد مولا بخش ہلاک ہوگیا ، متوفی کی لاش سول اسپتال لائی گئی، سول لائن کے علاقے پی آئی ڈی سی کے قریب نامعلوم گاڑی کی ٹکر 16سالہ خیال مینا دختر امین خان ہلاک ہوگئی۔

پولیس کے مطابق متوفیہ سلطان آباد کی رہائشی تھی ورثا لاش پولیس کارروائی کے بغیر لے گئے ، تیموریہ کے علاقے بفرزون ہارون شاپنگ سینٹر کے قریب ہفتے اور اتوار کی درمیانی شب مہران کار اور موٹر سائیکل میں تصادم کے نتیجے میں کار میں سوار23سالہ شیخ یعقوب ولد جمیل اور موٹر سائیکل سوار فرحان ولد احمد شدید زخمی ہوگئے ، زخمیوں کو طبی امداد کے لیے عباسی شہید اسپتال منتقل کیا گیا ، جہاں پہلے شیخ یعقوب اور پھر فرحان دوران علاج زخموں کی تاب نہ لاتے ہوئے دم توڑ گئے۔

پولیس کے مطابق متوفی یعقوب گلستان جوہر کا رہائشی تھا اور اکلوتا بیٹا تھا، رات کو اپنے دوستوں سے ملنے گیا تھا جبکہ فرحان نارتھ ناظم آباد بلاک این کا رہائشی تھا، ہلاک ہونے والوں کے ورثا نے پولیس رپورٹ کرانے سے انکار کر دیا، ڈاکس کے علاقے ابراہیم حیدری سٹی کریک کے مقام پر گہرے سمندر میں مچھلی کا جال ڈالتے ہوئے ماہی گیر35 سالہ ریاض عرف بادشاہ ولد عبداﷲ خاصخیلی ڈوب گیا جس کی تلاش جاری ہے، فشر فورک فام کے ترجمان سامی میمن کے مطابق متوفی ریاض ابراہیم حیدری خاصخیلی محلے کا رہائشی تھا، بلدیہ ٹائون نمبر3 میں ایک خالی دکان سے 30سالہ نامعلوم شخص کی لاش ملی جس کو پولیس نے سول اسپتال منتقل کیا ، ایس ایچ او پرویز خان کے مطابق دکان بغیر شٹر کی تھی۔

متوفی صورت شکل سے نشے کا عادی لگتا ہے تاہم حتمی طور پر کچھ بھی کہنا قبل از وقت ہوگا ،کورنگی کے علاقے ڈھائی نمبر آنکھوں کے اسپتال کے قریب سے40سالہ نامعلوم شخص پر اسرار طور پر ہلاک ہو گیا ، متوفی کی لاش پولیس تھانے لے گئی جہاں سے قانونی کارروائی کے بعد لاش ایدھی سرد خانے منتقل کر دی ، پولیس کے مطابق متوفی نشے کا عادی لگتا تھا جبکہ شارع نور جہاں کے علاقے کٹی پہاڑی کے قریب نامعلوم گاڑی کی ٹکر سے موٹر سائیکل سوار18 سالہ فیض الرحمٰن، خواجہ اجمیر نگری تھانے کے قریب نامعلوم گاڑی کی ٹکر سے19 سالہ جمشید ولد رفیق اور عبد اﷲ کالج کے قریب نامعلوم گاڑی کی ٹکر سے30 سالہ عائشہ زخمی ہو گئی۔