کیا بھارتی فلمساز ستیش کوشک کو قتل کیا گیا

فوٹو : اے ایف پی

---

بھارتی فلمساز اور اداکار ستیش کوشک کی موت کے معاملے پر چونکا دینے والی پیش رفت سامنے آرہی ہے۔

ستیش کوشک کی اچانک موت کے چند دن بعد ایک خاتون نے دہلی پولیس میں شکایت درج کروائی جس میں الزام لگایا گیا کہ فلمساز کو اس کے شوہر نے 15 کروڑ روپے کے تنازع پر قتل کیا۔

اطلاعات کے مطابق خود کو دہلی کے ایک تاجر کی بیوی ہونے کا دعویٰ کرنے والی خاتون نے بتایا کہ ستیش کوشک میرے شوہر سے رقم واپس مانگ رہا تھا جس پر شوہر نے ادکار سے چھٹکارا پانے کے لیے اسکو کچھ گولیاں دے کر قتل کر دیا۔

دریں اثنا، ای ٹائمز نے دہلی پولیس کے قریبی ذرائع سے رابطہ کیا جنہوں نے کوشک کی غیر فطری موت کے امکان کو مسترد کیا اور انکشاف کیا کہ خاتون کی طرف سے درج شکایت کی تصدیق نہیں کی جا سکتی۔

مزید پڑھیں؛ بالی ووڈ کے کامیڈی اداکار ستیش کوشک انتقال کرگئے

واضح رہے کہ 9 مارچ کو بالی ووڈ کے سینیئر اداکار ستیش کوشک 66 برس کی عمر میں انتقال کر گئے تھے۔ ستیش کوشک کو نئی دہلی میں کار میں سفر کے دوران دل کا دورہ پڑا جس سے وہ موقع پر ہی دم توڑ گئے۔

ستیش کوشک کو 1987 کی سپر ہٹ فلم مسٹر انڈیا میں کیلنڈر کے کردار سے کافی پذیرائی ملی تھی جس کے بعد انہوں نے متعدد فلموں میں کامیڈی کردار کیے۔

وہ ایک مشہور ہدایتکار اور اسکرین رائٹر بھی تھے۔ ستیش کوشک نے سلمان کی مشہور فلم تیرے نام، روپ کی رانی چوروں کا راجا، پریم اور مشہور فلم ہم آپ کے دل میں رہتے ہیں سمیت کئی فلمیں ڈائریکٹ کی ہیں۔