موسمیاتی تبدیلی کے باعث پاکستان انتہائی خطرے میں ہے ورلڈ بینک

خشک سالی،سیلاب کی وجہ سے ناگزیر واقعات رونما ہونے کے نمایاں امکانات ہیں

Staff Reporter March 14, 2023

اعلیٰ سطح کے وفد کی وزیراعلیٰ سندھ سے ملاقات،شرکا کو پریزینٹیشن دی گئی (فوٹو : فائل)

پاکستان کو موسمیاتی تبدیلی کی وجہ سے انتہائی خطرے کا سامنا ہے جب کہ غربت کے خاتمے کے لیے اہم اقدامات اٹھانے کی ضرورت ہے۔

عالمی بینک کے اعلیٰ اختیاراتی وفد نے اپنے علاقائی ڈائریکٹر برائے سسٹین ایبل ڈیولپمنٹ (SD) جنوبی ایشیا مسٹر جان اے روم کی قیادت میں وزیراعلیٰ سندھ سید مراد علی شاہ سے وزیراعلیٰ ہاؤس میں ملاقات کی۔

اجلاس میں صوبائی وزرا، چیف سیکرٹری، چیئرمین پی اینڈ ڈی اور دیگر نے شرکت کی۔ورلڈ بینک کے ریجنل ڈائریکٹر فارسائوتھ ایشیا نے ایک پریزنٹیشن کے ذریعے اجلاس کو بتایا کہ پاکستان کی حالیہ غربت میں اضافے کی وجہ میکرو مالیاتی کمزوریاں، کم اور غیر مستحکم شرح نمو ہے۔

رپورٹ کے مطابق پاکستان کم جی ایچ جی کا اخراج کرنے والا ملک ہے لیکن پاکستان کے پاس ایسے مواقع موجود ہیں کہ وہ فضا کو اپنے مفاد میں بہتر بناسکے۔ موسمیاتی تبدیلی ملک پر پہلے ہی تباہ کن اثرات مرتب کر رہی ہے۔ 2002 میں غیر معمولی سیلاب سے ملک کا ایک تہائی حصہ زیر آب آیا اور 1,700 اموات ہوئیں سیلاب کے بعد کی صورتحال ہمیں ایک طویل مدتی اور منظم حکمت عملی بنانے کا اہم موقع پیش کرتی ہے۔

وزیراعلیٰ سندھ نے پی اینڈ ڈی ٹیم کو ہدایت کی کہ وہ عالمی بینک کی رپورٹ اور سفارشات کا مطالعہ کرے اور پھر رپورٹ کی روشنی میں اپنا ترقیاتی منصوبہ مرتب کرے تاکہ پائیدار ترقی کے ذریعے صوبے سے غربت کا خاتمہ کیا جاسکے۔