پولیس کے چھاپوں اور مقابلوں میں152 ملزمان گرفتار

سرچ آپریشن میں گرفتار ہونیوالے ملزمان میں گینگ وار کارندے اور بھتہ خور شامل ہیں فوٹو: فائل

---

پولیس اور رینجرز نے شہر کے مختلف علاقوں میں سرچ آپریشن ، چھاپوں اور مقابلوں کے بعد گینگ وار کے ملزم اور بھتہ خور سمیت152 ملزمان کو گرفتار کر کے اسلحہ ، گولیاں ، موٹر سائیکلیں ، بم بنانے کا کیمیکل، دستی بم اور منشیات برآمد کرنے کا دعویٰ کیا ہے۔

رینجرز ترجمان کے مطابق رینجرز سندھ نے شہر کے مختلف علاقوں مہران ٹاؤن ، پی آئی بی پرانی سبزی منڈی ، غریب آباد ، کھوکھراپار اور لانڈھی 89 مسلم آباد میں ٹارگٹڈ آپریشن کے دوران 5 ملزمان کو گرفتار کر کے بم بنانے کا15 کلو کیمیکل اور مسروقہ موٹر سائیکل برآمد کرلی، گلشن ڈویژن پولیس کی بھاری نفری نے ایس پی گلشن تنویر تنیو کی سربراہی میں گلستان جوہر کے علاقے مدھو گوٹھ اور حسین ہزارہ گوٹھ سمیت ملحقہ علاقوں میں سرچ آپریشن کے دوران 100 مشتبہ افراد کو حراست میں لیکر تھانے منتقل کر دیا گیا ، ڈی آئی جی ایسٹ منیر شیخ نے بتایا کہ حراست میں لیے جانے والوں میں سے 80 افراد کو پوچھ گچھ کے بعد رہا کر دیا، تحقیقات کے دوران ان کا کوئی کرمنل ریکارڈ نہیں ملا جبکہ 20 مشتبہ افراد کو تاحال حراست میں لیا ہوا ہے اور ان کا کرمنل ریکارڈ چیک کرایا جا رہا ہے،سرچ آپریشن میں ریپڈ رسپانس فورس ( آر آر ایف) کے افسران و اہلکاروں نے بھی حصہ لیا، واضح رہے کہ گزشتہ سال سابق ایس ایچ او گلستان جوہر سلیم کی جانب سے بھتہ وصول کرنے پر شروع ہونے والا تنازع خونی تصادم میں تبدیل ہوگیا تھا جس میں ڈی ایس پی گلشن اقبال قاسم غوری اور ایک اے ایس آئی لینڈ مافیا کے کارندوں کی فائرنگ سے زندگی کی بازی ہار گئے تھے۔

اس خونی مقابلے کے بعد مدہو گوٹھ میں پولیس کی بھاری نفری نے محاصرہ کر کے تمام خارجی اور داخلی راستوں کو سیل کر دیا تھا جبکہ پولیس کا کہنا ہے کہ مذکورہ سرچ آپریشن یونیورسٹی روڈ سمیت ملحقہ علاقوں میں اسٹریٹ کرائمز کی وارداتوں اور دیگر جرائم میں ملوث ملزمان کی اطلاع پر کیا گیا تھا تاہم پولیس کو کوئی اہم کامیابی حاصل نہیں ہو سکی، کراچی پولیس کے ترجمان کی جانب سے جاری کیے جانے والے اعداد و شمار کے مطابق ایسٹ ، ویسٹ اور ساؤتھ پولیس نے گذشتہ 24گھنٹوں کے دوران شہر کے مختلف علاقوں سے مجموعی طور پر 125 ملزمان کو گرفتار کرلیا،گارڈن پولیس نے اسٹریٹ کرائم کی وارداتوں میں ملوث ملزم ذوہیب کو گرفتار کر کے اسلحہ اور موٹر سائیکل برآمد کرلی ، پولیس کا کہنا ہے کہ ملزم کا تعلق لیاری گینگ وار سے ہے جو کہ چاکیواڑہ کا رہائشی ہے ، شیرشاہ پولیس نے پنکھا ہوٹل کے قریب دکانداروں سے بھتہ طلب کرنے کے لیے آنے والے بھتہ خور طارق کو رنگے ہاتھوں گرفتار کر کے اسلحہ اور بھتے کی رقم برآمد کرنے کا دعویٰ کیا ہے۔