(فوٹو: پی ایس ایل)
قذافی اسٹیڈیم لاہور میں بدھ کو ہونیوالے میچ میں لاہور قلندرز کی ٹیم ملتان سلطانز کے 161 رنز ہدف کے تعاقب میں صرف 76 رنز پر ہی ڈھیر ہوگئی، ملتان سلطانز مسلسل تیسری بار پی ایس ایل کے فائنل میں پہنچنے میں کامیاب ہوگئی ہے۔
لاہور کے صرف تین کھلاڑی ڈبل فگر میں داخل ہوسکے، سام بلنگز 19، حارث روف 15 اور ڈیوڈ ویزے 12 رنز بنانے میں کامیاب ہوئے، ملتان کی طرف سے کوٹریل نے تین، اسامہ میر نے دو وکٹیں حاصل کیں۔
Consistencyᵀᴹ 🙌
3️⃣rd consecutive final for @MultanSultans as @lahoreqalandars crash to the third-lowest HBLPSL total.#HBLPSL8 | #SabSitarayHumaray | #LQvMS pic.twitter.com/JMEGQq70Jq
- PakistanSuperLeague (@thePSLt20) March 15, 2023
قبل ازیں ملتان سلطانز نے ٹاس جیت کر پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 160 رنز بنائے تھے۔ کیرون پولارڈ نے 34 گیندوں پر 57 رنز کی شاندار اننگز کھیلی۔
ملتان سلطانز کے کپتان محمد رضوان 33، عثمان خان 29 اور ٹم ڈیوڈ 22 رنز کیساتھ نمایاں رہے۔ لاہور قلندرز کے حارث رؤف نے 3 کھلاڑیوں کو آؤٹ کیا۔
یاد رہے کہ لاہور قلندرز 2022 میں پی ایس ایل کی فاتح اور ملتان سلطانز رنز اپ رہی تھی، ٹورنامنٹ کے جاری سیزن کے لیگ مرحلے کے دونوں میچوں میں لاہور قلندرز نے ملتان سلطانز کو شکست سے دوچار کیا تھا۔
واضح رہے کہ لاہور کی ٹیم ابھی ایونٹ سے باہر نہیں ہوئی، ایونٹ میں کل ایلی مینیٹر ون اسلام آباد اور پشاور کے درمیان کھیلا جائے گا، ایلی مینیٹر ون ہارنے والی ٹیم ایونٹ سے باہر ہو گی جبکہ جیتنے والی ٹیم لاہور قلندرز کے خلاف 16 مارچ کو ان ایکشن ہوگی اور اس میچ میں جو ٹیم جیتی وہ فائنل میں ملتان سلطانز کا مقابلہ کرے گی۔
میچ میں ملتان سلطانز کی قیادت محمد رضوان اور لاہور قلندرز کی کپتانی فاسٹ بولر شاہین شاہ آفریدی نے کی۔
پلیئنگ الیون ملتان سلطانز:
محمد رضوان کپتان، عثمان خان، رائیلی روسو، ٹِم ڈیوڈ، کیرن پولارڈ، خوشدل شاہ، انور علی، اسامہ میر، عباس آفریدی، شیلڈن کوٹرل، احسان اللہ
پلیئنگ الیون لاہور قلندرز:
شاہین آفریدی کپتان، فخر زمان، عبداللہ شفیق، طاہر بیگ، وکٹ کیپر سیم بلنگز، حسین طلعت، ڈیوڈ ویزا، سکندر رضا، راشد خان، حارث رؤف، زمان خان
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔