عمران خان کی گرفتاری سے حکومت کا کوئی تعلق نہیں وفاقی وزیر اطلاعات

عمران خان قانون سے تعاون کرنے کی بجائے مسلسل قانون شکنی کر رہے ہیں، مریم اورنگزیب


ویب ڈیسک March 16, 2023
عمران خان قانون سے تعاون کرنے کی بجائے مسلسل قانون شکنی کر رہے ہیں، مریم اورنگزیب

وفاقی وزیر اطلاعات مریم اورنگزیب نے کہا ہے کہ عمران خان کی گرفتاری سے حکومت کا کوئی تعلق نہیں۔

مریم اورنگزیب نے اسکائی نیوز اور بی بی سی نیوز سے گفتگو کرتے ہوئے کہا کہ عمران خان مسلسل جھوٹ بول رہے ہیں، ان کی گرفتاری سے حکومت کا کوئی تعلق نہیں، نہ ہی ان کی گرفتاری کا انتخابات میں تاخیر سے کوئی تعلق ہے۔

مریم اورنگزیب کا کہنا تھا کہ عمران خان قانون سے تعاون کرنے کی بجائے مسلسل قانون شکنی کر رہے ہیں، پولیس صرف عدالتی احکامات پر عمل درآمد کر رہی ہے، ان پر کرپشن کے مقدمات ہیں اور انہیں گرفتار کر کے عدالت میں پیش کرنا ہے، پولیس پر پٹرول بموں سے مسلسل حملے ہو رہے ہیں۔

وزیر اطلاعات نے زور دیا کہ پولیس کے پاس کسی قسم کا کوئی اسلحہ نہیں، ڈی آئی جی آپریشنز لاہور سمیت 65 پولیس اہلکار زخمی ہو چکے ہیں۔

مریم اورنگزیب نے کہا کہ عدالت کی طرف سے جاری وارنٹ گرفتاری پولیس اسلحہ کے بغیر عمران خان کو گرفتار کرنے کے لئے زمان پارک میں موجود ہے، عمران خان کو ذمہ داری سے کام لینا چاہئے۔

مریم اورنگزیب نے سوال اٹھایا کہ عمران خان کہتے ہیں کہ انہیں سیکورٹی خطرات ہیں اور اسی لمحہ کہتے ہیں کہ وہ سیاسی جلسے کرنے کے لئے تیار ہیں، جب عدالت انہیں مقدمات میں پیش ہونے کا کہتی ہے تو عمران خان سیکورٹی خطرات کا بہانا بناتے ہیں۔

وزیر اطلاعات نے کہا کہ عمران خان پاکستان میں خانہ جنگی، سول وار اور افراتفری چاہتے ہیں، وہ لوگوں کو تشدد کیلئے بھڑکا رہے ہیں، عمران خان اپنی مقبولیت کو ملک میں خانہ جنگی، تشدد، انارکی کو ہوا دینے کے لئے استعمال نہیں کر سکتے۔

ان کا کہنا تھا کہ پولیس جب عمران خان کو گرفتار کرنے آتی ہے تو وہ خواتین اور بچوں کو پولیس کے سامنے کھڑا کر دیتا ہے، پاکستان کی موجودہ خراب معاشی صورتحال کا ذمہ دار عمران خان ہے، عمران خان نے ملک کو ڈیفالٹ کے دھانے پر پہنچایا۔

مریم اورنگزیب نے کہا کہ عمران خان نے مارچ 2022ءمیں اپنے ہی دستخط کردہ آئی ایم ایف پروگرام کی خلاف ورزی کی، عمران خان کے وارنٹ گرفتاری ان کے خلاف کرپشن کے مقدمات میں جاری ہوئے ہیں۔

انہوں نے مزید کہا کہ عمران خان نے اپنے چار سالوں میں اپنے سیاسی مخالفین پر جھوٹے مقدمات قائم کئے، انہیں جیلوں میں ڈالا، عمران خان جب وزیراعظم تھے تو اپنے سیاسی مخالفین کے وارنٹ گرفتاری خود جاری کرواتے تھے، عمران خان پاکستان کے تشخص کو پامال کرنے پر تلے ہوئے تھے، جب وہ وزیراعظم تھے تو میڈیا کے ساتھ بھی ناروا سلوک کیا۔

تبصرے

کا جواب دے رہا ہے۔ X

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔

مقبول خبریں