رمضان پیکیج کے تحت پنجاب خیبرپختونخوا میں آٹے کی مفت فراہمی شروع

وزیراعظم نے مفت آٹے کی فراہمی کی ہدایت دی تھی:فوٹو:فائل

---

رمضان پیکج کے تحت پنجاب ، خیبر پختونخوا اور اسلام آباد میں مفت آٹے کی فراہمی شروع ہوگئی۔

وزیراعظم شہباز شریف کی ہدایت پرخصوصی رمضان پیکج پر عمل درآمد کا آغاز ہوگیا ہے جس کے تحت غریب خاندانوں کو مفت آٹا فراہم کیا جائے گا۔

مزید پڑھیں: پنجاب میں رمضان پیکج کے تحت غریب گھرانوں کو مفت آٹا فراہم کرنے کی منظوری

شعبان کی 25 تاریخ سے رمضان کی 25 تاریخ تک ہر غریب خاندان کو آٹے کے 3 تھیلے ملیں گے۔ وزیراعظم دیگر صوبائی حکومتوں کو بھی غریب عوام کو مفت آٹا فراہم کرنے کی ہدایت کر چکے ہیں۔

ڈپٹی کمشنر اسلام آباد عرفان نواز میمن کا کہنا ہے کہ ہر رجسٹرڈ صارف کو پہلی مرتبہ 10 کلو آٹے کا ایک تھیلا ملے گا اور 2 تھیلے 7 دن بعد ملیں گے۔ پورے مہینے کے لیے آٹے کے 3 تھیلے ملیں گے۔

ڈپٹی کمشنر اسلام آباد نے مزید کہا کہ مفت آٹے کے معیار پر کسی قسم کا سمجھوتا نہیں کریں گے مفت آٹے کی تقسیم شفاف طریقے سے یقینی بنائی جائے گی۔