گلوکار طلحہ یونس کو 15 لاکھ مالیت کا گمشدہ بیگ واپس مل گیا
طلحہ یونس اپنا شولڈر بیگ کراچی ایئرپورٹ کے پارکنگ ایریا میں بھول گئے تھے
سول ایوی ایشن اتھارٹی نے جناح ٹرمینل پارکنگ سے ملنے والا 15 لاکھ روپے مالیت کا سامان بیگ سمیت مسافر کو لوٹا دیا۔
معروف میوزک بینڈ ینگ اسٹنرز کے گلوکار طلحہ یونس اپنا شولڈر بیگ کراچی ایئرپورٹ کے پارکنگ ایریا میں بھول کر چلے گئے تھے جس میں موجود سامان کی مالیت تقریباً 15 لاکھ روپے بتائی گئی ہے۔
ترجمان سی اے اے کے مطابق اسلام آباد سے کراچی آنے والا مسافر طلحہ اپنا شولڈر بیگ پارکنگ ایریا میں بھول گیا تھا، بیگ ملنے پر اسے ڈیوٹی مینیجر نے آفس میں جمع کرادیا۔
ڈیوٹی منیجر نے ویجیلنس اہلکاروں کی موجودگی میں بیگ کو چیک کیا، اس دوران بیگ میں موجود موبائل بج اٹھا اور کال اٹینڈ کی گئی، پریشان مسافر کو بیگ وصول کرنے کے لئے ایئرپورٹ آنے کا کہا گیا۔
مسافر ڈی ٹی ایم آفس آیا اور ویجیلنس اہلکاروں کی موجودگی میں بیگ اس کے حوالے کر دیا گیا، شولڈر بیگ میں موجود اشیاء کی مالیت کا اندازہ تقریباً 15 لاکھ روپے لگایا گیا، طلحہ یونس نے سی اے اے حکام بلخصوص ویجلنس اہلکاروں کی بھرپور تعریف کی اور شکریہ ادا کیا۔