قومی شاہراہ پر لوٹ مار مزاحمت پر نوجوان زخمی مقابلے میں ڈاکو مارا گیا

مسلح افراد نے 2 کاریں 3 موٹر سائکلیں چھین لیں،ایک ڈاکو گرفتار،پولیس نے مختلف علاقوں مین چھاپے،6 افراد زیر حراست۔ فوٹو: فائل

---

بھٹ شاہ کے قریب مسلح افراد کی لوٹ مار،2 کاریں اور 3موٹرسائکلیں چھین لیں،مزاحمت پر نوجوان زخمی، پولیس اور ڈاکوئوں میں فائرنگ کے تبادلے میں ایک ڈاکو مارا گیا، دوسرا گرفتارکر لیا گیا۔

دیگر علاقوں میں چھاپوں کے دوران مزید 6 مشکوک افراد بھی حراست میں لے لیے گئے۔ بھٹ شاہ کے قریب قومی شاہراہ پر مسلح افراد نے گاڑیوں سے لوٹ مار کی جبکہ 2 کاریں اور 3 موٹرسائیکلیں بھی چھین لیں۔ لوٹ مار کے دوران مزاحمت پر ڈاکوئوں نے ایک نوجوان علی محمد ڈاہری کو فائرنگ کر کے شدید زخمی کر دیا۔

اطلاع پر پولیس اور ڈاکوئوں کے درمیان فائرنگ کا تبادلہ ہوا جس کے نتیجے میں ایک ڈاکو ہلاک ہوگیا جبکہ ایک ڈاکو کو گرفتار کر لیا گیا۔ پولیس نے دیگر علاقوں میں چھاپے مارکر شک کی بنیاد پر دیگر 6 افراد کو حراست میں لے لیا، جن سے تفتیش جاری ہے۔ لوگوں نے لوٹ مار کے خلاف مظاہرے بھی کیے۔ دوسری جانب ہالا بھٹ شاہ میں آئے روز لوٹ مار کی وارداتوں میں اضافے پر ہالا، بھٹ شاہ کے مختلف لنک روڈز پر مٹیاری پولیس کے خلاف احتجاج کیا اور شاہراہیں بلاک کر کے ٹریفک کی آمد و رفت معطل کر دیں۔