مسجد نبوی میں اعتکاف کے خواہش مندوں کیلیے بڑی خوش خبری

مسجد نبوی میں اعتکاف کی رجسٹریشن کا تاریخ کا اعلان کردیا گیا

ویب ڈیسک April 04, 2023

مسجد نبوی میں اعتکاف کے خواہش مند خود کو ایپ کے ذریعے رجسٹرڈ کروائیں؛ فوٹو: فائل

رمضان المبارک کے آخری عشرے میں مسجدِ نبوی میں اعتکاف کے خواہش مند معتمرین کے لیے آج سے رجسٹریشن کا آغاز ہوگیا۔

سعودی میڈیا کے مطابق رواں برس خانہ کعبہ اور مسجد نبوی کی زیارت کرنے اور عبادتوں کی انجام دہی کے لیے دنیا بھر سے ریکارڈ تعداد میں فرزندگان توحید سعودی عرب پہنچے ہیں۔

کورونا پابندیوں کے خاتمے کے بعد سے دنیا بھر سے مسلمان دیوانہ وار مکہ و مدینہ دوڑے چلے آئے ہیں جس کے باعث رمضان المبارک کے پہلے عشرے میں مسجد نبوی میں آنے والوں کی تعداد ایک کروڑ سے تجاوز کرگئی ہے۔

لاکھوں معتمرین کی خواہش ہے کہ رمضان کے آخری عشرے میں اعتکاف کی سعادت وہ مسجدِ نبوی میں حاصل کریں جس کے لیے آج سے رجسٹریشن کا آغاز ہوگیا۔

حرمین شریفین کے امور کی کمیٹی نے اعلان کیا ہے کہ مسجد نبوی میں اعتکاف کے خواہش مند 'زائرون' ایپ کے ذریعے خود کو رجسٹرڈ کرائیں۔