خانپور اسکول کے راستے سے اغوا بچے بہاولپور سے بازیاب والدین کا اظہار تشکر

11 سالہ شایان اور 7 سالہ سبحان کو گھر سے اسکول جاتے ہوئے اغوا کیا گیا تھا (فوٹو سوشل میڈیا)

---

خانپور میں اسکول جاتے ہوئے اغوا کیے گئے 2 بچوں کو بہاولپور سے بازیاب کروا لیا گیا۔

ذرائع کے مطابق مغوی بچوں کے والد ڈاکٹر حسن محمود کا کہنا ہے کہ پولیس ٹیم نے میری فیملی کے ساتھ بچوں کی ویڈیو کال کے ذریعے بات کروائی ہے۔ انہوں نے بچوں کی بازیابی پر اللہ کا شکر ادا کیا ہے۔ بچوں کی بازیابی کی خبر ملتے ہی شہری بڑی تعداد میں مبارک باد دینے ڈاکٹر حسن محمود کے گھر پہنچ گئے۔

خان پور ضلع رحیم یار خان سے ڈاکٹر حسن کے دو بچوں کو سکول جاتے ہوئے اغوا کر لیا گیا۔

یہاں ہمارے بچے محفوظ نہیں اور حکومت سیاسی انتقام کو توشہ آخرت سمجھ کے مصروف عمل ہے۔ pic.twitter.com/BMpJ6JZSBU

- Mahboob Sattar (@SattarMahboob) April 7, 2023

واضح رہے کہ خان پور میں اغوا کاروں نے سابق ایم ایس تحصیل ہیڈ کوارٹر اسپتال خان پور ڈاکٹر حسن محمود کے بچوں کو گزشتہ روز صبح اسکول جاتے ہوئے راستے سے اغوا کیا تھا۔ بچوں کی والدہ بھی ڈاکٹر ہیں۔ 11 سالہ شایان اور 7 سالہ سبحان گاڑی پر ڈرائیور کے ساتھ اسکول جا رہے تھے کہ راستے میں ڈاکوؤں نے روک کر اغوا کرلیا۔

اغوا کیے جانے کی سی سی ٹی وی فوٹیج بھی سوشل میڈیا پر وائرل ہوئی، جس میں 3 اغوا کار دیکھے جا سکتے ہیں۔ واقعے کے بعد شہر میں خوف و ہراس پھیل گیا۔

 

اسلام علیکم ۔۔ گزشتہ کئی دہائیوں سے تحصیل صادق آباد خاص طور پر ڈاکوؤں نشانہ چلا آ رہا ہے مگر اب خان پور میں ڈاکٹر فیملی کے دو کمسن بیٹوں کا دلیری سے اغوا کا واقع نا قابل برداشت ہے ڈی پی او ماں کی فریاد سنیں اور چوبیس گھنٹوں میں برآمد کر کے ماں اور ضلع کے عوام پر رحم کریں pic.twitter.com/YTulnfNzpw - Kamran Anwar (@KamranA30954350) April 8, 2023

دریں اثنا گزشتہ روز اسکول جاتے ہوئے اغوا کیے گئے مغوی بچوں کی دادی نے ڈاکوؤں سے بچوں کو رہا کردینے کی التجا کی کی تھی، جس کی درد ناک ویڈیو سوشل میڈیا پر وائرل ہوگئی۔ واقعے کے بعد سے مغوی بچوں کے اہل خانہ شدت غم سے نڈھال تھے جب کہ بچوں کی دادی نے سوشل میڈیا پر ڈاکوؤں سے رہائی کی التجا کی تھی۔

بچوں کی دادی نے ڈاکوؤں کو روتے ہوئے مخاطب کرتے ہوئے کہا کہ دونوں بچے بیمار ہیں، مبارک مہینے کا واسطہ، بچوں کو گھر چھوڑ جائیں۔ انہوں نے کہا کہ اغوا کار بھائیوں سے اپیل کرتی ہوں کہ بچوں کو چھوڑ دو۔بچے صبح اسکول بھی بھوکے روانہ ہوئے تھے۔