تائیوان کے اطراف چین کے جنگی بیڑوں کی گشت اور طیاروں کی پروازیں
تین چینی جنگی جہاز تائیوان کی سمندری حدود میں موجود ہیں، تائپی
تائیوان کے صدر سائی انگ وین اور امریکی ایوان کے اسپیکر کیون میکارتھی کی ملاقات سے ناراض چین نے تائیوان کے ارد گرد اپنے جنگی بیڑوں کو تعینات کرنا شروع کردیا ہے۔
بین الاقوامی میڈیا کے مطابق بیجنگ کی جانب سے تائیوان کو بارہا تنبیہہ کرنے کے باوجود امریکی عہدیدار سے ملاقات کے بعد چین نے تائیوان کی سرحد کے قریب اپنے نگی بیڑوں کو تعینات کرنا شروع کردیا ہے۔
تائیوان کی وزارت دفاع نے کہا کہ تین چینی جنگی جہاز تائیوان کی سمندری حدود میں موجود ہیں جبکہ ایک لڑاکا طیارہ اور ایک آبدوز شکن ہیلی کاپٹر نے بھی تائیوان کے فضائی زون کو عبور کیا۔
چین کا طیارہ بردار بحری جہاز تائیوان کے جنوب مشرقی پانیوں سے گزر کر مغربی بحر الکاہل کی طرف روانہ ہوا تھا جبکہ اس سے چند گھنٹے قبل ہی سائی کی امریکا میں میکارتھی سے ملاقات ہوئی تھی،۔
تائیوان کے صدر کا صحافیوں سے گفتگو میں کہنا تھا کہ ان کی حکومت اپنے عوام کی آزادانہ اور جمہوری طرز زندگی کو یقینی بنانے کے لیے پرعزم ہے اور ہم دونوں فریقوں کے درمیان امن اور استحکام کو برقرار رکھنے کے لیے اپنی پوری کوشش کریں گے۔
واضح رہے کہ چین نے تائیوان کے صدر کو امریکی حکام سے ملاقات سے قبل بُرے نتائج سے خبردار کیا تھا اور کہا تھا کہ چین کو کمزور کرنے کیلئے یہ امریکا کی سازش ہے اور چین اپنی خودمختاری اور علاقائی سالمیت کے مضبوط تحفظ کے لیے ہر ممکن اقدامات کرے گا۔