شارع نورجہاں پولیس نے پیسے چھینے شورمچانے پرفائرنگ کرکے مقابلہ قراردیدیا زخمی شخص کا بیان

انعام کی رقم کے حصول کے لئے کراچی پولیس کی جانب سے مقابلوں کے واقعات میں اضافہ ہوگیا ہے۔ فوٹو: فائل

---

لاہور: پولیس کا کہنا تھا کہ آج صبح اورنگی ٹاؤن ٹاؤن کٹی پہاڑی پر پولیس مقابلہ ہوا تھا جس کے دوران ایک شخص ہلاک اوردوسرا زخمی ہوگیا تھا تاہم زخمی شخص کا اپنے بیان میں کہنا ہے کہ پولیس نے ہمیں روک کرپیسے چھینے کی کوشش جس پر شور کیا تو اہلکاروں نے فائرنگ کردی۔

ایکسپریس نیوز کے مطابق پولیس نے دعویٰ کیا تھا کہ کراچی کے علاقے اورنگی ٹاؤن میں کٹی پہاڑی کے قریب صبح 6 بجے پولیس اہلکاروں نے موٹرسائیکل سواروں کو رکنے کا اشارہ کیا تاہم نہ رکنے پر فائرنگ کی گئی جس کے نتیجے میں ایک شخص مارا گیا جب کہ دوسرا زخمی ہوگیا، زخمی شخص کو طبی امداد کے لئے اسپتال منتقل کردیا گیا۔

پولیس کی فائرنگ سے زخمی ہونے والے شخص جمعہ خان کا کہنا ہےکہ وہ اپنے کزن کے ہمراہ اپنے لاپتہ بھانجے کی تلاش کے لئے نکلا تھا کہ شارع نورجہاں پولیس نے انہیں کٹی پہاڑی پر روکا اور پیسے چھین لئے جس پر شور مچایا تو پولیس نے ان پر فائرنگ شروع کردی جس کے نتیجے میں اس کا کزن محمد یونس موقع پر ہی جاں بحق ہوگیا جب کہ وہ خود زخمی ہوگیا۔

واضح رہے کہ انعام کی رقم کے حصول کے لئے کراچی پولیس کی جانب سے مقابلوں کے واقعات میں اضافہ ہوگیا ہے۔