کراچی جھگڑے کے دوران بیوی نے فائرنگ کرکے شوہر کو قتل کردیا

فوٹو : فائل

---

گلستان جوہر حسین ہزارہ گوٹھ میں بیوی نے جھگڑے کے دوران شوہر کو فائرنگ کر کے قتل کردیا، پولیس نے ملزمہ کو گرفتار کر کے اسلحہ برآمد کرلیا۔

پولیس کے مطابق گلستان جوہر کے علاقے بلاک 11 حسین ہزارہ گوٹھ میں گھر کے اندر فائرنگ کے واقعے میں 40 سالہ ضمیر حسین نامی شخص جاں بحق ہوگیا، واقعے کی اطلاع ملتے ہی پولیس موقع پر پہنچ گئی اور مقتول کی لاش کو ضابطے کی کارروائی کے لیے جناح اسپتال منتقل کیا۔

ایس ایچ او گلستان جوہر عدیل نے بتایا کہ پولیس نے مقتول کی اہلیہ رشنا پروین کو گرفتار کرکے نائن ایم ایم پستول اپنے قبضے میں لے لیا ہے جبکہ ابتدائی تحقیقات کے مطابق گھر میں جھگڑے کے دوران ملزمہ نے شوہر پر فائرنگ کی تھی تاہم فوری طور پر وجہ کا معلوم نہیں ہو سکی اس حوالے سے پولیس مزید معلومات حاصل کر رہی ہے۔