حکومت نے ترقیاتی منصوبوں کیلیے129 ارب جاری کر دیے

وزارت آبی وسائل کو 30ارب، مواصلات 22ارب، ایچ ای سی کو 7ارب کے فنڈز جاری

INP April 17, 2023

فاٹا، آزاد کشمیر، گلگت بلتستان میں ترقیاتی منصوبوں کیلیے 27ارب روپے بھی شامل،اعلامیہ—فائل فوٹو

وزارتِ منصوبہ بندی نے ترقیاتی منصوبوں کیلیے 129ارب روپے جاری کر دیے۔

وزارت منصوبہ بندی نے چوتھی سہ ماہی کے دوران جاری ترقیاتی منصوبوں کیلیے فنڈز جاری کیے ہیں، وزارت منصوبہ بندی نے رواں سال کے ترقیاتی بجٹ میں گزشتہ سال کے مقابلے میں 50 ارب روپے زائد جاری کیے ہیں،آخری سہ ماہی کے لیے جاری کردہ 129ارب روپے کے بعد مجموعی ترقیاتی بجٹ 600ارب روپے کا ہوگیا ہے۔

اعلامیے کے مطابق جاری کردہ فنڈز میں فاٹا، آزاد کشمیر، گلگت بلتستان میں ترقیاتی منصوبوں کیلئے 27ارب روپے بھی شامل ہیں،معاشی بحران کے باوجود چوتھی سہ ماہی کی ریلیز کو یقینی بنایا گیا۔

رواں سال کے ترقیاتی بجٹ میں گزشتہ سال کے 550ارب روپے کے مقابلے میں 50ارب روپے زائد جاری کیے گئے، وزارت آبی وسائل کو 30ارب، وزارت مواصلات کو 22ارب، ایچ ای سی کو 7ارب ، وزارت ہائوسنگ اینڈ ورکس کو 4ارب، ریلوے کو 8ارب اور وزارت توانائی کو 5ارب روپے کے فنڈز جاری کیے ہیں۔