مردم شماری میں کوئٹہ کی آبادی 17 فیصد کم کردی گئی ہے قاسم سوری

پاکستان تحریک انصاف کے سینئر نائب صدر اور سابق ڈپٹی اسپیکر قومی اسمبلی قاسم سوری نے کہا ہے کہ مردم شماری میں کوئٹہ کی آبادی کو 17 فیصد کم کردیا گیا ہے۔

کوئٹہ میں پریس کانفرنس کرتے ہوئے قاسم سوری نے کہا کہ ملک بھر میں مردم شماری ہورہی ہے ، بلوچستان کی آبادی میں 47 فیصد اضافہ ہوا مگر کوئٹہ کی آبادی 17 فیصد کم کردی گئی ہے۔ انہوں نے کہا کہ ایسی مردم شماری اور اس کے نتائج ہم کسی صورت تسلیم نہیں کریں گے۔


قاسم سوری نے مزید کہا کہ سپریم کورٹ نے پنجاب میں انتخابات کا حکم دیا ہے جبکہ حکومت سیکیورٹی سمیت مختلف وجوہات کا بہانہ بنا کر انتخابات سے فرار ہونے کی کوشش کر رہی ہے، عدالت نے سیاسی جماعتوں کو مل بیٹھ کر مشاورت کرنے کا کہا ہے جو ایک اچھی روایت ہے۔

انہوں نے دعویٰ کیا کہ لندن پلان کے ذریعے پاکستان تحریک انصاف کے رہنماوٴں کو گرفتار کیا جارہا ہے۔