ٹیم مینجمنٹ پر احسان اللہ کا اعتماد تباہ کرنے کا الزام

اچھا پرفارم کرنے والے پیسر کو صلاحیتیں نکھارنے کا موقع دینا چاہیے تھا، محمد عامر۔ فوٹو: فائل

---

محمد عامر نے پاکستانی ٹیم مینجمنٹ پر احسان اللہ کا اعتماد تباہ کرنے کا الزام عائد کر دیا۔

احسان اللہ کو فاسٹ بولنگ میں پاکستان کیلیے مستقبل کی امید قرار دیا جارہا ہے، مگر انھیں نیوزی لینڈ کیخلاف ہوم ٹی ٹوئنٹی سیریز کے اب تک کھیلے جانے والے چاروں میچز میں باہر رکھا گیا.

اس حوالے سے گفتگو کرتے ہوئے محمد عامر نے کہا کہ میں احسان اللہ کو نیوزی لینڈ کیخلاف سیریز میں بولنگ کرتا دیکھنے کا منتظر تھا مگر ان کو بینچ پر بٹھائے رکھا گیا، وہ پی ایس ایل 8اور افغانستان کیخلاف میچز میں سب سے اچھا پرفارم کرنے والے بولر تھے، کرکٹ شائقین میں سے ہر کوئی ان کی تیز اور خطرناک بولنگ سمیت جشن منانے کے انداز سے لطف اندوز ہوا، ہمیں احسان اللہ کا اعتماد تباہ کرنے کے بجائے صلاحیتوں کو نکھارنے کی مواقع فراہم کرنا چاہیے۔

یہ بھی پڑھیں: احسان کو نیوزی لینڈ کے خلاف نہ کھلانا سمجھ سے باہر ہے، شاہدآفریدی

یاد رہے کہ اس سے قبل رمیز راجہ اور شاہد آفریدی سمیت کئی دیگر سابق کرکٹرز نے بھی احسان اللہ کو نیوزی لینڈ کیخلاف سیریز کا کوئی میچ نہ کھلانے پر حیرت کا اظہار کیا تھا۔

پیسر نے پی ایس ایل 8میں ملتان کی نمائندگی کرتے ہوئے صلاحیتوں کی دھاک بٹھائی،وہ 22وکٹوں کے ساتھ کامیاب ترین بولرز کی فہرست میں دوسرے نمبر پر تھے،شارجہ میں افغانستان کیخلاف ٹی ٹوئنٹی سیریز میں انھوں نے سب سے زیادہ 6شکار کیے،ان کے خطرناک باؤنسرز کی دنیا بھر میں شہرت ہوئی مگر نیوزی لینڈ سے ہوم سیریز میں وہ تاحال پانی پلانے تک محدود رہے ہیں۔