طُورخم بارڈر امدادی کارروائیوں کے دوران لینڈ سلائیڈنگ
خوش قسمتی سے امدادی ٹیمیں اور دیگر افراد محفوظ رہے، آئی ایس پی آر
طُور خم بارڈرپر پاکستان آرمی کی طرف سے جاری امدادی کاروائیوں کے دوران اچانک لینڈ سلائیڈنگ ہو ئی تاہم خوش قسمتی سے امدادی ٹیمیں اور دیگر افراد محفوظ رہے۔
آئی ایس پی آر کے مطابق عید کے موقع پر بھی پاکستانی قوم کی خوشیوں کو قائم رکھنے کے لیے پاکستان آرمی اور ایف سی کے جوان امدادی کام کے مکمل ہونے تک لگا تار کام جاری رکھیں گے۔
آئی ایس پی آر کے مطابق پاکستان آرمی انجینئرز، آرمی اربن سرچ اینڈ ریسکیوٹیمیں اور متعدد ڈمپرز، ڈوزر اور دیگر آلات و مشینری متاثرہ علاقے میں مشکل حالات کے باوجود امدادی سرگرمیوں کو مکمل کرنے کے لئے پر عزم ہیں۔
آئی ایس پی آر کے مطابق قوم کی دعاؤں اور اللہ کی مدد سے پاکستان آرمی جلد صورتحال پر قابو پا لے گی اور آخری زخمی اور جاں بحق فرد کو نکالنے تک امدادی اور ریسکیو کا کام جاری رکھے گی۔