کاؤنٹی چیمپئن شپ محمد عباس کا جادو برقرار 6 وکٹیں اڑادیں

اظہرعلی بھی بڑی اننگز نہیں کھیل پائے، ظفر گوہر کے اولین کوشش میں 22 رنز۔ فوٹو: فائل

---

انگلش کاؤنٹی چیمپئن شپ میں ہیمپشائر نے نارتھمپٹن کو اننگز اور 270 رنز سے شکست دے دی جب کہ پاکستانی پیسر محمد عباس نے میچ میں 6 شکارکیے۔

انگلش کاؤنٹی چیمپئن شپ میں ہیمپشائر نے نارتھمپٹن کو اننگز اور 270 رنز سے شکست دے دی،فاتح الیون نے اولین اننگز میں 8 وکٹ پر 482 کا مجموعہ ترتیب دیا، حریف ٹیم پہلی باری میں 149 رنز پر ڈھیر ہوکر فالوآن کا شکار بنی، جس میں پاکستانی پیسر محمد عباس نے 33 رنز دیکر 2 وکٹیں نام کیں، ناکام سائیڈ دوسری باری میں 63 رنز پر ہمت ہارگئی۔

یہ بھی پڑھیں: ہیمپشائر کا مانچسٹر سٹی کلب کے منیجر کو عباس کا کمرہ دینے سے انکار

محمد عباس نے 31 رنز کے عوض 4 شکار کیے، سسیکس اور یارکشائر کا مقابلہ ہارجیت کے بغیر ختم ہوگیا، سسیکس نے پہلی باری میں 361 اور دوسری باری میں 137 رنز بنائے، یارکشائر نے 298 اور دوسری کاوش میں 3 وکٹ پر 138 رنز اسکور کیے۔

یارکشائر میں شامل پاکستانی بیٹر سعود شکیل یکسر ناکام رہے، انھوں نے محض 3 اور 6 رنز بناکر پویلین کی راہ لی۔ گلوسٹرشائر اور ووسٹرشائر کا مقابلہ ڈرا ہوگیا۔

یہ بھی پڑھیں: کاؤنٹی چیمپئن شپ، اظہر علی بڑی اننگز نہ کھیل سکے

گلوسٹرشائر نے پہلی باری میں 231 اور دوسری کاوش میں 4 وکٹ پر 226 رنز بنائے، ظفر گوہر نے پہلی باری میں 53 گیندوں پر 22 رنز بنائے جبکہ دوسری میں انھیں بیٹنگ کا موقع نہیں مل پایا، ووسٹرشائر نے 157 اور دوسری میں 4 وکٹ پر 51 رنز اسکور کیے۔

اظہرعلی پہلی باری میں صفر جبکہ دوسری میں صرف 9 رنز بناسکے۔ ڈرہم اور گلیمورگن کا مقابلہ بھی فیصلہ کن ثابت نہیں ہوسکا، ڈرہم نے اولین اننگز 9 وکٹ 471 پر تمام کی، گلیمورگن نے 305 اور پھر 6 وکٹ پر 104 رنز اسکورکیے۔