امریکی طالبعلم کو 125 جامعات میں داخلے اور 90 لاکھ ڈالر اسکالر شپ کی پیشکش

ڈینس برنیس کے مطابق اس نے 200 کالج اور جامعات کے لیے کوشش کی تھی اور خیال ہے کہ اسکالرشپ ایک کروڑ ڈالر تک ہوجائے گی

ویب ڈیسک April 27, 2023

ڈینس برنیس کو 4.98 جی پی اے کے بعد 125 امریکی کالج میں داخلہ اور 90 لاکھ ڈالر کی اسکالرشپ ملی ہے جو امریکی تاریخ میں ایک ریکارڈ بھی ہے۔ فوٹو: دی گارجیئن

امریکی طالبعلم کی جانب سے ہائی اسکول میں شاندار کامیابی کے بعد اسے نہ صرف 125 کالج اور جامعات نے داخلے کی پیشکش کی ہے بلکہ اسے مجموعی طور پر 90 لاکھ ڈالر اسکالر شپ کی پیشکش ہوئی ہے جو ایک نیا ریکارڈ بھی ہے۔

اس سے قبل 2019 میں لیفیٹے، لاس اینجلس کی نورمیڈے کورمیئر نے 87 لاکھ ڈالر کی اسکالرشپ اپنے نام کرتے ہوئے ایک ریکارڈ بنایا تھا۔ تاہم اب نیو اورلینس کے ایک نوجوان، ڈینس برنیس نے کل 200 جامعات اور کالجوں میں داخلے کی کوشش کی جن میں سے 125 اداروں نے انہیں داخلہ دیدیا اور انہیں کل 90 لاکھ ڈالر کی اسکالرشپ ملی ہے جس کی پاکستانی کرنسی میں قدر ڈھائی ارب روپے ہوگی۔

تاہم ڈینس کا خیال ہے کہ وہ 4 مئی تک اپنے کالج کا فیصلہ کریں گے اور شاید اس وقت تک اسکالرشپ کی رقم ایک کروڑ ڈالر تک پہنچ جائے گی۔

اس کامیابی کی وجہ یہ ہے کہ ان کا جی پی اے (گریڈ پوائنٹ ایوریج) 4.98 ہے جو ایک غیرمعمولی کامیابی ہے۔ انہوں نے کمپیوٹر سائنس اور جرمیاتی انصاف میں انڈرگریجویٹ ڈگری لی ہے۔