رمیز راجا کا شاہین اور حارث کی بالنگ اسپیڈ میں کمی پر تشویش کا اظہار

حارث کو اپنا پیس اور یارکر کرنے کی ضرورت ہے تاکہ وکٹیں ملیں، سابق کرکٹر (فوٹو: ایکسپریس ویب)

---

پاکستان کرکٹ بورڈ (پی سی بی) کے سابق چیئرمین اور کرکٹر رمیز راجا نے شاہین شاہ آفریدی اور حارث رؤف کی بالنگ اسپیڈ کم ہونے پر تشویش کا اظہار کیا ہے۔

اپنے یوٹیوب چینل پر گفتگو کرتے ہوئے سابق کرکٹر رمیز راجا نے کہا کہ پنڈی کرکٹ اسٹیڈیم میں نیوزی لینڈ کے خلاف پہلے ون ڈے میچ کے دوران پاکستان کے نوجوان فاسٹ بولر شاہین آفریدی اور حارث رؤف کی بالنگ میں اسپیڈ کی کمی نظر آرہی ہے۔

انہوں نے کہا کہ حارث کو ٹی20 اور ون ڈے بالنگ میں فرق کرنا پڑے گا کیونکہ وہ مسلسل ایک روزہ کرکٹ میں لینتھ بال کررہے ہیں جس کی وجہ سے انہیں ہٹنگ کرنا آسان ہوتا ہے، سابق کرکٹر نے مشورہ دیا کہ حارث کو اپنا پیس اور یارکر کرنے کی ضرورت ہے تاکہ وکٹیں ملیں۔

مزید پڑھیں: بابراعظم تیزترین 12ہزار انٹرنیشنل رنز بنانے والے پاکستانی بیٹر بن گئے

سابق چیئرمین نے کہا کہ شاہین آفریدی کو بھی اپنی گیندبازی میں تھوڑی ویرییشن لانے کی ضرورت ہے تاکہ وہ ان پچز پر مزید موثر کردار ادا کریں۔ مان لیں کہ 10 اوور کا اسپیل ہے، پھر میں سمجھ سکتا ہوں کہ 2، 3 اوورز میں زیادہ رفتار نہیں لگارہے لیکن انہیں تھوڑی اسپیڈ بڑھانی ہوگی۔

مزید پڑھیں: بابراعظم کی شاداب کے والدین سے ملاقات کی ویڈیو وائرل

واضح رہے کہ نیوزی لینڈ کے خلاف پہلے ون ڈے میں شاہین آفریدی نے 10 اوورز میں 63 رنز کے عوض 2 جبکہ حارث رؤف نے اپنے کوٹے کے 10 اوورز کے دوران 65 رنز دیکر 2 کھلاڑیوں کو پویلین کی راہ دیکھائی تھی۔