کراچی مبینہ پولیس مقابلے میں نوجوان کی ہلاکت پر ہندوبرادری کا احتجاج

مقابلے میں ملوث پولیس افسر کو معطل کرکے ایس پی گلشن اقبال کی سربراہی میں انکوائری کمیٹی قائم کردی گئی ہے

Staff Reporter May 02, 2023

دونوں نوجوان کزن تھے اور گھر سے کچھ سامان لینے کے لیے نکلے تھے، وکیل ( فوٹو: ایکسپریس )

نیوٹاؤن انویسٹی گیشن پولیس کے ہاتھوں مبینہ مقابلے میں نوجوان کی ہلاکت کے بعد ہندو برادری نے نیو ٹاؤن تھانے کے سامنے احتجاجی مظاہرہ اور واقعے کی غیرجانبدارانہ تحقیقات کا مطالبہ کیا، جبکہ مبینہ جعلی مقابلے میں ملوث انویسٹی گیشن افسر سید فرمان کو معطل کردیا گیا ہے۔

تفصیلات کے مطابق پیر کی شب نیو ٹاؤن انویسٹی گیشن پولیس نے اسٹیڈیم روڈ پر نجی اسپتال کے قریب مبینہ مقابلے میں ڈاکو کو ہلاک کر کے اس کے ساتھی کو گرفتار کرنے کا دعویٰ کیا تھا۔

پولیس کے مطابق موٹر سائیکل سوار 2 ڈاکو شہری سے لوٹ مار کر کے فرار ہو رہے تھے کہ اس نے پولیس موبائل کو واقعے سے آگاہ کیا جس پر ڈاکوؤں کا تعاقب کیا گیا تو انھوں نے پولیس پر فائرنگ کر دی اور جوابی فائرنگ میں ایک ڈاکو ہلاک ہوگیا جبکہ دوسرے کو گرفتار کر لیا گیا۔

واقعے کی اطلاع نوجوان کے اہلخانہ کو ملی تو ہندو برادری سے تعلق رکھنے والے افراد کی بڑی تعداد نیوٹاؤن تھانے پہنچ گئی اور مقابلے کو جعلی قرار دیتے ہوئے ذمے داروں کے خلاف قانونی کارروائی اور واقعے کی غیر جانبدارانہ تحقیقات کا مطالبہ کیا۔

اس موقع پر ہندو برادری کے ہمراہ موجود بابر مرزا ایڈووکیٹ نے بتایا کہ فائرنگ سے ہلاک ہونےو الا اور گرفتار نوجوان آپس میں کزن اور پرانی سبزی منڈی کے رہائشی تھے جو گھر سے ڈیڑھ سو روپے لے کر کچھ خریدنے کے لیے گئے تھے۔

بابرمرزا ایڈووکیٹ کے مطابق دونوں نوجوانوں میں سے ایک کو پولیس نے مبینہ مقابلے میں ہلاک کر کے دوسرے نوجوان کو گرفتار کرلیا، مقتول جس موٹر سائیکل پر سوار تھا وہ اس کی اپنی ہے جبکہ پولیس نے مقدمہ میں درج کیا ہے کہ ملزمان نے پولیس پر فائرنگ کی تو پولیس نے جوابی فائرنگ کی۔

بابر مرزا ایڈووکیٹ نے مزید بتایا کہ ہندو برادری کے احتجاج پر ایس ایس پی ایسٹ اور ایس پی انویسٹی گیشن سے ملاقات کرائی گئی جس پر مبینہ مقابلے میں ملوث انویسٹی گیشن افسر سید فرمان کو معطل کردیا گیا ہے جبکہ زیر حراست انیل کا بیان قلمبند کیا جا رہا ہے ، پولیس افسران کی ہدایت پر ایس پی گلشن اقبال کی سربراہی میں ایک انکوائری کمیٹی قائم کر دی گئی ہے۔