نعت ریکارڈ کرنے کے بہانے چور نے نابینا مؤذن کا موبائل فون لوٹ لیا

شاطرملزم نے آن لائن ایپ کا پاس ورڈ بدل کر 35 ہزار روپے بھی نکلوالیے

---

گلستان جوہرمیں مسجد کے نابینا مؤذن سے نامعلوم ملزم قیمتی موبائل فون لیکرفرارہوگیا، شاطرملزم نے آن لائن ایپ کا پاس ورڈ تبدیل کیا اور 35 ہزار روپے بھی نکلوا لیے۔

متاثرہ مؤذن کی جانب سے گلستان جوہر تھانے میں تحریری درخواست جمع کردی گئی،ملزم کی سی سی ٹی وی فوٹیج بھی منظرعام پرآگئی ہے۔

گلستان جوہربلاک ایک میں جامعہ مسجد الہدی کے بینائی سے محروم مؤذن سے نامعلوم ملزم قیمتی موبائل فون لیکرفرارہوگیا،شاطرملزم نےآن لائن ایپ کے ذریعے35 ہزار روپے بھی نکلوا لیے۔

متاثرہ مؤذن کی جانب سے گلستان جوہرتھانے میں تحریری درخواست بھی جمع کرادی گئی ہے۔

مؤذن محمد امجد نے ایکسپریس سے بات چیت کرتے ہوئے بتایا کہ وہ گزشتہ نوسال سے اس مسجد ومدرسے سے وابستہ ہیں اورانھوں نے اپنی دینی تعلیم بھی یہیں مکمل کی ہے اور عالم بننے کے بعد گزشتہ دو سال سے مسجد کے مؤذن بھی ہیں اور بچوں کو دینی تعلیم بھی فراہم کررہے ہیں۔

گلستان جوہر میں نابینا موذن کو نعت ریکارڈ کرنے کے بہانے لوٹنے والے ملزم کو تلاش کرکے قرار واقعی سزا دی جائے، اس بے غیرت شخص کا چہرہ بہت واضح ہے، اس کی گرفتاری میں شہری پولیس اور رینجرز کی مدد کریں

ریٹویٹ کردیں مدد ہوجایگی انشاءاللہ pic.twitter.com/vGrE3OPy4f

— Sanam Jamali🇵🇰 (@sana_J2) May 3, 2023

انھوں نے مزید بتایا کہ یہ واقعہ دوروزقبل یکم مئی کو عصر اورمغرب کی نمازکے درمیان پیش آیا،وہ نمازعصر کے بعد مسجد کے باہر آ رہے تھے کہ اسی دوران ایک ملزم ان کے پاس آیا جس نے اپنا نام حسن بتایا اور کہا کہ آپ کی آواز بہت اچھی ہے آپ کی نعت پڑھتے ہوئے ویڈیو بنا کر سوشل میڈیا پر اپ لوڈ کروں گا جس کے بعد ویڈیو وائرل ہو جائے گی

اس بہانے ملزم نے مجھ سے میرا موبائل فون لیا اورکہا آپ کے ہی موبائل سے ویڈیو بناؤں گا کیونکہ آپ کے موبائل فون کے کیمرے کا رزلٹ اچھا ہے ہم مسجد میں بیٹھ گئے اورمیں نے نعت پڑھنا شروع کی تو ملزم میرا موبائل فون لیکرفرارہوگیا ،

انھوں نے بتایا کہ جس وقت ملزم مسجد میں داخل ہوااس وقت مسجد خالی تھی اور تمام افراد عصر کی نماز کی ادائیگی کے بعد چلے گئے تھے، ان کے موبائل فون میں ان کے قومی شناختی کارڈ کی کاپی بھی موجود تھی۔

شاطرملزم نے موبائل فون میں موجود آن لائن ایپ کا پاسورڈ تبدیل کیا اور35 ہزار روپے دوسرے موبائل فون نمبرزپرمنتقل کردیے،

انھوں نے بتایا کہ وہ عمرے کی ادائیگی کے لیے تھوڑی تھوڑی کر کے رقم جمع کررہے تھے اور پاسپورٹ بھی بنوا لیا تھا لیکن ملزم ان کی جمع پونجی لیکر فرار ہو گیا،

مسجد انتظامیہ کے پاس واقعے کی سی سی ٹی وی فوٹیج محفوظ ہے جو پولیس اور رینجرز کو فراہم کردی گئی ہے اورمسجد کی انتظامیہ کا مطالبہ ہے کہ اس ملزم کوفل الفورگرفتارکیا جائے اور مسجد کے مؤذن کا جو نقصان ہوا ہے اس کا ازالہ کیا جائے

ملزم کی سی سی ٹی وی فوٹیج بھی سامنے آگئی ہے جس میں دیکھا جا سکتا ہےکہ وہ اپنی موٹرسائیکل مسجد کے باہر کھڑی کرکے پیدل مسجد میں داخل ہوتا ہے اور مؤذن کو لیکرمسجد میں بیٹھ جاتا ہے

مؤذن نعت پڑھنے میں مصروف ہوتے ہیں اسی دوران ملزم آس پاس کسی کو نہ پاکرموقع دیکھ کرفرارہوجاتا ہے ،

پولیس نے ملزم کی تلاش شروع کردی ہے اورامید ہے جلد اس کا سراغ لگا لیا جائے گا۔