موسمیاتی تبدیلی جرمنی کا پاکستان کو 12 کروڑ یورو دینے کا وعدہ

اب پاکستان کو خطرات کی تشخیص کرنے میں مدد ملے گی، وزیرموسمیاتی تبدیلی

Numainda Express May 04, 2023

برلن میں کلائمیٹ ڈائیلاگ پر شیری رحمن کی جرمن وزیر سے ملاقات ،دوطرفہ تعلقات پر گفتگو۔ فوٹو: یو این آئی

جرمنی نے موسمیاتی تبدیلی کے اثرات سے نمٹنے کے لیے پاکستان کو12کروڑ یورو دینے کا وعدہ کیا ہے۔

جرمنی کے شہر برلن میں پیٹرزبرگ کلائمیٹ ڈائیلاگ کے موقع پر وفاقی وزیر موسمیاتی تبدیلی سینیٹر شیری رحمن نے جرمنی کی وفاقی وزارت اقتصادی تعاون کے ایک وفد کے ساتھ دوطرفہ ملاقات کی۔

ملاقات میں گفتگو تین اہم موضوعات پر مرکوز رہی جس میں سیلاب سے نمٹنے کے لیے بہتر تحفظ، قابل تجدید توانائی کے لیے پائیدار انفراسٹرکچر اور ماحولیاتی دھچکوں کا سامنا کرنے والے کمزور طبقات کی مدد کے لیے سماجی تحفظ کے پروگرام کو وسعت دینا شامل تھا۔

یہ بھی پڑھیں: شہری منصوبہ سازی اور موسمیاتی تبدیلیوں کی پاکستانی ماہر نے امریکی ایوارڈ جیت لیا

جرمن وزیر اقتصادی تعاون اور ترقی سوینجا شولز نے وعدہ کیا کہ جرمنی ان اقدامات میں تعاون کے لیے پاکستان کو 12کورڑ یورو کی امداد فراہم کرے گا۔

انھوں نے کہا موسمیاتی تبدیلیوں پر قابو پانے کے لیے تکنیکی حل کے ساتھ ساتھ یہ بھی اہم ہے کہ مستقبل میں موسم کے شدید اثرات سے بہتر طریقے سے نمٹنے کے لیے معاشروں کو تیار کیا جائے۔

یہ بھی پڑھیں: موسمیاتی تبدیلیوں کے باعث پنجاب میں ہیٹ ویو، گرمی کی شدت میں اضافے کا امکان

شیری رحمن نے جرمنی کا شکریہ ادا کیا اورکہا اس اقدام کے ذریعے پاکستان کو موسمیاتی خطرات کی تشخیص، ملک کے مختلف حصوں میں آب و ہوا کے خطرات کی پروفائلنگ، موسمیاتی تعلیم کی مرکزی حیثیت میں شمولیت کے لیے صلاحیت کی تعمیر میں مدد ملے گی۔

اختتام پر پاکستان میں توانائی کے تحفظ کے لیے گرین ہائیڈروجن کے امکانات سمیت مستقبل میں تعاون کے دیگر ممکنہ شعبوں پر بات چیت بھی ہوئی۔

وزرا نے موسمیاتی تبدیلیوں کے اثرات سے نمٹنے اور پائیدار مستقبل کی تعمیر کے لیے کوششوں کو آگے بڑھانے کے لیے جرمنی اور پاکستان کے درمیان تعاون جاری رکھنے کے امکانات کے بارے میں امید ظاہر کی۔