پی ٹی آئی رہنما میاں اسلم اقبال اوران کے ساتھیوں کے خلاف مقدمہ درج
رہنما پی ٹی آئی اور ان کے ساتھیوں نے تشدد کیا اور نیم برہنہ کر کے جان سے مارنے کی دھمکیاں دیں، مدعی سجاد شاہ
پاکستان تحریک انصاف کے رہنما میاں اسلم اقبال اوران کے ساتھیوں کے خلاف مقدمہ درج کرلیا گیا۔
مدعی سجاد شاہ کے مطابق پی ٹی آئی کے 27 ویں یوم تاسیس کے موقع پر ڈونگی گراﺅنڈ سمن آباد میں جلسہ کی ویڈیو بنا رہا تھا کہ اس دوران میاں اسلم اقبال کے قریبی ساتھیوں محمد ندیم ، علی عمران اور 6 نامعلوم افراد مجھے گراﺅنڈ کے اندر لے گئے۔
سجاد شاہ کی مدعیت میں درج ایف آئی آر کے مطابق مدعی نے بتایا کہ میری تلاشی لی پرس، موبائل فون ، شناختی کارڈ اپنے پاس رکھ لیا جبکہ ملزمان محمد ندیم ، علی عمران اور 6 نامعلوم افراد نے تشدد کرتے ہوئے کپڑے پھاڑے اور نیم برہنہ کر کے جان سے مارنے کی دھمکیاں دیں۔
سمن آباد پولیس نے پی ٹی آئی رہنما میاں اسلم اقبال، ندیم، علی عمران اور چھ نامعلوم افراد کے خلاف سنگین دفعات کے تحت مقدمہ درج کرلیا۔