کراچی شہری کی فائرنگ سے 2 مبینہ ڈاکو ہلاک
شہری موقع سے غائب ہوگیا، جائے وقوعہ سے 2 پستول، 3 موبائل فونز اورچھینی ہوئی موٹر سائیکل قبضے میں لی ہے، پولیس
نارتھ ناظم آباد میں فائیو اسٹار چورنگی کے قریب شہری کی فائرنگ سے 2 مبینہ ڈاکو ہلاک ہوگئے۔
ایس ایچ او نارتھ ناظم آباد امجد کیانی نے بتایا کہ فائیو اسٹار چورنگی سے شپ اونر چورنگی جاتے ہوئے نجی اسپتال کے قریب لوٹ مار کی واردات کے دوران فائرنگ کی اطلاع پر پولیس موقع پر پہنچی اور ہلاک اور شدید زخمی ہونے والے مبینہ ڈاکو کو عباسی شہید اسپتال منتقل کیا جہاں وہ بھی زخموں کی تاب نہ لاتے ہوئے دم توڑ گیا۔
انھوں نے بتایا کہ ابتدائی تحقیقات میں معلوم ہوا ہے کہ فائرنگ ایک شہری کی جانب سے کی گئی تھی جسے دونوں ڈاکو لوٹنے کی کوشش کر رہے تھے، مگر اس واقعے کے بعد شہری موقع سے غائب ہوگیا۔
ایس ایچ او امجد کیانی کے مطابق جائے وقوعہ سے 2 پستول ، 3 موبائل فونز اور ایک موٹرسائیکل ملی ہے جوپیر آباد تھانے کی حدود سے چھینی گئی تھی۔
فوری طور پر ہلاک ہونے والے ڈاکوؤں کی شناخت نہیں ہو سکی تاہم پولیس بایو میٹرک سسٹم کی مدد سے ہلاک ہونے والے ڈاکوؤں کی شناخت کے حوالے سے کوششیں کر رہی ہے۔
مبینہ ڈاکوؤں کی عمریں 22 سے 25 سال کے قریب بتائی جاتی ہیں جبکہ ان کی لاشیں تلاش ورثا کے لیے ایدھی سرد خانے میں رکھوا دی گئی ہیں۔
پولیس جائے وقوعہ کے قریب کلوز سرکٹ کیمروں کو تلاش کر رہی ہے تاکہ ان کی فوٹیجز کی مدد سے تحقیقات میں مدد مل سکے اور فائرنگ کرنے والے شہری کا بھی کوئی سراغ مل سکے ۔