نوابشاہ زمین کے تنازع پر تصادم ایک شخص جاں بحق4 زخمی

سکرنڈ کے نواحی گوٹھ کی جمالی برادری کے 2 گروہوں میں مورچہ بند فائرنگ، علاقے میں شدید کشیدگی، پولیس کی بھاری نفری طلب

---

KARACHI: منگل کی صبح سکرنڈ کے قریب گوٹھ کرم جمالی میں زمین کے تنازع پر جمالی برادری کے 2 گروہوں میں تصادم ہوگیا۔

فریقین مورچہ بند ہو کر ایک دوسرے پر شدید فائرنگ کرتے رہے۔ فائرنگ سے 35 سالہ میر محمد جمالی جاں بحق ، جبکہ 4 افراد شدید زخمی ہوگئے جن میں اورنگزیب جمالی بھی شامل ہے۔ زخمیوں کو پیپلزپارٹی میڈیکل کالج اسپتال داخل کرادیا گیا ہے، دوسری جانب پولیس کی بھاری نفری جائے وقوعہ پہنچی اور دونوں گروپوں کے درمیان فائرنگ بند کرا دی ۔

تاہم علاقے میں سخت کشیدگی موجود ہے اور دونوں گروہ مورچہ بند ہیں، کڈھر پولیس نے مقتول میر محمد جمالی کی لاش تحویل میں لے کر پی ایم سی اسپتال سے پوسٹ مارٹم کرانے کے بعد ورثا کے حوالے کر دی۔ انتظامیہ نے مزید کسی خون ریزی سے بچنے کے لیے پولیس کی بھاری نفری تعینات کر دی ۔ جاں بحق ہونے والا شخص علاقے کی بااثر سیاسی شخصیت میر مقبول جمالی کا بھائی بتایا جاتا ہے۔