رام مندر کی تعمیر کا معاملہ آئین کے دائرہ کار میں رہ کر طے کیا جائے گا نريندر مودی

میرے لئے تمام بھارتی شہری ایک ہیں، نریندر مودی فوٹو: اے ایف پی/فائل

---

بھارتیہ جنتا پارٹی کی جانب سے وزارت عظمی کے امیدوار نریندر مودی کا کہنا ہے کہ کوئی انہیں ووٹ دے یا نہ دے اگر وہ اقتدار میں آئے تو ان کی حکومت بلا تفریق مذہب ہر بھارتی شہری کا خیال رکھے گی اور رام مندر کی تعمیر کا معاملہ آئین کے دائرہ کار میں رہ کر طے کیا جائے گا۔

بھارتی ٹی وی میں جاری کئے گئے ایک وڈیو پیغام میں ہندو قوم پرست جماعت بھارتیہ جنتا پارٹی کے رہنما نريندر مودی نے کہا ہے کہ ان کے لئے تمام بھارتی ایک ہیں اور مسلمان بھائیوں سمیت معاشرے کے تمام طبقوں تک رسائی ان کی ذمہ داری ہے۔ گجرات کے وزیر اعلیٰ کی حیثیت سے انہوں نے ریاست کے 6 کروڑ عوام کو ملانے کی ہر ممکن کوشش کی، اسی طرح اگر وہ وزیر اعظم بنے تو ملک کے ایک ارب 25 کروڑ عوام کی زندگی میں مثبت تبدیلی کے لئے ہر ممکن کوشش کریں گے اور رام مندر کی تعمیر کا معاملہ آئین کے دائرہ کار میں رہ کر طے کیا جائے گا۔

واضح رہے کہ بھارت میں پارلیمانی انتخابات جاری ہیں اور عوامی جائزوں کے مطابق نريندر مودی کو ان انتخابات میں کامیابی حاصل ہو سکتی ہے، مودی کی جانب سے یہ بیان ایک ایسے وقت سامنے آیا ہے جب بھارت میں بسنے والے مسلمانوں کی جانب سے یہ تشویش ظاہر کی جا رہی ہے کہ اگر وہ وزیر اعظم بن گئے تو ان کے حقوق پر کاری ضرب پڑ سکتی ہے۔