افغان صدارتی انتخابات کے نتائج دھاندلی کے الزامات کے باعث 2 روز کیلئے ملتوی

غیر سرکاری نتائج کے مطابق عبداللہ عبداللہ کو 44.4 فیصد ووٹوں کے ساتھ اشرف غنی پر برتری حاصل ہے۔ فوٹو؛ فائل

---

افغانستان کے صدارتی انتخابات کے نتائج دھاندلی کے الزامات کے باعث 2 روز کے لئے ملتوی کر دیئے گئے ہیں۔

غیر ملکی خبررساں ایجنسی کے مطابق افغان الیکشن کمیشن کی جانب سے جاری ایک بیان میں کہا گیا ہے کہ افغان صدر کا چناؤ عوام کی خواہشات کے مطابق ہونا چاہیئے، ووٹوں کی گنتی میں دھاندلی کی شکایات کی مکمل تحقیقات کے باعث انتخابات کے نتائج 2 روز کے لئے ملتوی کر دیئے گئے ہیں، اب انتخابی نتائج کا اعلان 24 کے بجائے 26 اپریل کو کیا جائے گا۔

واضح رہے کہ غیر سرکاری اور غیر حتمی نتائج کے مطابق افغانستان کے سابق وزیر خارجہ عبداللہ عبداللہ کو 44.4 فیصد ووٹوں کے ساتھ قریب ترین حریف اشرف غنی پر برتری حاصل ہے جنہوں نے 33.2 فیصد ووٹ حاصل کر رکھے ہیں۔