امریکی کمپنی کی پاکستان کے گلابی نمک میں 20 کروڑ ڈالر سرمایہ کاری کی پیشکش

پاکستان اس نمک کی ایکسپورٹ سے صرف 70 ملین ڈالر کماتا ہے جبکہ یہ صلاحیت بارہ ارب ڈالر سالانہ ہے، امریکی کمپنی (فوٹو : فائل)

---

معروف امریکی کمپنی نے پاکستان میں پائے جانے والے پنک ہمالین سالٹ کے ذخائر نکالنے اور ایکسپورٹ کی مد میں دو سو ملین ڈالر سرمایہ کاری کی پیشکش کردی۔

ایکسپریس نیوز کے مطابق نمک کی درآمد ، تیاری اور سپلائی کے حوالے سے شہرت یافتہ معروف امریکی کمپنی میریکل سالٹ ورکس کولیکٹیو اِن کارپوریشن نے سفیر پاکستان مسعود خان سے ملاقات کی اور انہیں اس حوالے سے باقاعدہ بریفنگ دی۔

امریکا کی مختلف ریاستوں اور برطانیہ سے پاکستان آںے والی میریکل سالٹ ورکس کولیکٹیو انکارپوریشن کی اعلی قیادت کے وفد میں صدر اور سی ای او احمد این خان، نائب صدر ٹیڈ ایم بالنٹائن، چیف کمیونی کیشن آفیسر محمد ایم خان، جیفری میلنڈر، ایم شمشیر خان، مارٹن عنصر (وینکوور کینیڈا)، نسیم طیب (وینکوور کینیڈا)، ڈین ٹیریٹ (وینکوور کینیڈا)، رانا ریحان انور (سینٹ لوئس)، ٹونی گارسن (لندن انگلینڈ) اور عتیق رانا ( سینٹ لوئس) شامل تھے۔

کمپنی نے انہیں بتایا کمپنی پاکستان میں پائے جانے والے پنک سالٹ کو نکالنے، پروسیسنگ اور اس کی عالمی سطح پر تقسیم میں تقریباً دو سو ملین ڈالر کی سرمایہ کاری کرے گی۔

سفیر کو بریفنگ کے دوران بتایا گیا کہ پاکستان میں پنک سالٹ کے وسیع ذخائر موجود ہیں جس کی سالانہ آمدنی 12 ارب ڈالر تک ہو سکتی ہے۔ ایک اندازے کے مطابق پاکستان کے پاس تقریباً 22.22 ارب ٹن پنک سالٹ کے قدرتی وسائل موجود ہیں جو زیادہ تر کالا باغ، ورچہ، کھیوڑہ اور بہادر خیل کے سالٹ رینج کے علاقوں میں پائے جاتے ہیں۔ ان ذخائر کی بدولت بڑے پیمانے پر معاشی سرگرمیاں شروع کرنے کی بے پناہ صلاحیت موجود ہے۔

بتایا گیا کہ پالیسی فریم ورک، پروسیسنگ، پیکیجنگ اور عالمی سطح پر تقسیم کے لیے سہولیات کی کمی کے سبب اس وقت پاکستان اس منفرد نمک کی ایکسپورٹ سے صرف 70 ملین ڈالر کماتا ہے جبکہ یہ صلاحیت تقریباً بارہ ارب ڈالر سالانہ ہے۔

ایم ایس سی آئی کے صدر احمد خان نے سفیر پاکستان کو بتایا کہ کمپنی پاکستان منرل ڈویلپمنٹ کارپوریشن کے ساتھ جوائنٹ وینچر کر رہی ہے، کمپنی کا منصوبہ ہے کہ وہ عالمی سطح پر مارکیٹ کے بارے میں آگاہی پیدا کرے اور 2030ء تک 10 ملین ٹن تصدیق شدہ ذخائر نکال لے۔

سفیر پاکستان مسعود خان نے کہا کہ گلابی نمک کی نہ صرف خطے بلکہ پوری دنیا میں ایک بہت بڑی مارکیٹ ہے جو اس شعبے میں منافع بخش کاروباری منصوبے کی ضمانت دیتی ہے۔

سفیر پاکستان نے وفد کو یقین دلایا کہ سفارت خانہ کمپنی کو اپنے کاروباری منصوبے کو جلد حتمی شکل دینے اور اس پر عمل درآمد میں ہر ممکنہ سہولت کاری فراہم کرے گا۔