ایک ہفتے میں دوسری بڑی کارروائی بلوچستان سے اربوں مالیت کی چرس برآمد

گزشتہ ہفتے گوادر کے جنرل ایریا کلڈان جھل سے بھی بھاری مقدار میں منشیات برآمد ہوئی تھی (فوٹو فائل)

---

پاکستان کوسٹ گارڈز نے ایک ہفتے میں دوسری بڑی کارروائی کرتے ہوئے بلوچستان سے اربوں روپے مالیت کی چرس برآمد کرلی۔

ترجمان کے مطابق پاکستان کوسٹ گارڈز نے اورماڑہ کے علاقے اشپیاق سے بھاری مقدار میں منشیات سمندر کے راستے اسمگل کرنے کی کوشش ناکام بناتے ہوئے 680 کلوگرام (17 من) چرس برآمد کرلی۔

یہ خبر بھی پڑھیں: کوسٹ گارڈز کی بلوچستان میں بڑی کارروائی، اربوں روپے مالیت کی چرس برآمد

ڈی جی پاکستان کوسٹ گارڈز نے متعلقہ کمانڈر کو اپنے علاقے میں چیکنگ مزیدسخت کرنے کے احکامات جاری کرتے ہوئے اشپیاق کے علاقے میں گشت کے لیے ٹیم تشکیل دی تھی، جس نے دوران چیکنگ اشپیاق کے علاقے میں 680کلوگرام اعلیٰ کوالٹی کی چرس برآمد کرلی، جس کی بین الاقوامی مارکیٹ میں مالیت 11.34 ملین ڈالر بنتی ہے۔

چرس سمندر کے راستے بیرون ملک اسمگل ہونا تھی۔ پاکستان کوسٹ گارڈز نے چرس تحویل میں لے کر ملزمان کی تلاش شروع کر دی ہے۔ ترجمان کی جانب سے جاری بیان میں کہا گیا ہے کہ پاکستان کوسٹ گارڈز ہر قسم کی منشیات اور اسمگلنگ کی روک تھام کے لیے ہمہ وقت مصروف عمل ہے۔ معاشرے کو منشیات سے دُور رکھنے میں اپنا کردار ادا کر تی رہے گی۔