آئی سی سی کی کمائی بڑے بھارتی حصے پر مزید سوال اٹھ گئے

ابھی کچھ بھی فائنل نہیں ہوا، جون کی میٹنگ میں مزید بحث ہوگی، جنوبی افریقہ

Sports Desk May 19, 2023

ابھی کچھ بھی فائنل نہیں ہوا، جون کی میٹنگ میں مزید بحث ہوگی، جنوبی افریقہ۔ فوٹو: نیٹ

آئی سی سی کی کمائی میں بڑے بھارتی حصے پر مزید سوال اٹھ گئے۔

انٹرنیشنل کرکٹ کونسل کو 2024 سے 2027 کے دورانیے میں 600 ملین ڈالر کی آمدنی متوقع ہے، اس میں سب سے بڑا حصہ بھارت کو ملنے کی اطلاعات ہیں۔

ایک رپورٹ میں کہا گیا کہ بی سی سی آئی کو 38.5 فیصد کے حساب سے 230 ملین ڈالر ملیں گے، اس پر پاکستان کی جانب سے پہلے ہی اعتراض کیا جا چکا، اب دیگر بورڈز بھی دبے الفاظ میں تحفظات اظہار کررہے ہیں۔ جنوبی افریقہ کو مجوزہ فارمولے کے تحت 4.37 فیصد کے حساب سے 26.24 ملین ڈالر ملیں گے۔

یہ بھی پڑھیں: آئی سی سی ریونیو، بندر بانٹ نے پاکستانی ماتھے پر شکنیں بڑھادیں

کرکٹ جنوبی افریقہ کے چیف ایگزیکٹیو فلوٹسی موسیکی کا کہنا ہے کہ ریونیو کی یہ تقسیم حتمی نہیں بلکہ اس پر ابھی مزید بات چیت ہوگی، انھوں نے کہا کہ اس رپورٹ کا افشا ہونا کافی بدقسمتی کی بات ہے، اس میں جو اعدادوشمار پیش کیے گئے وہ فائنل نہیں ہیں، ان پر بدستور ابھی بات چیت ہونی ہے، ابھی یہ صرف ٹیبل پر موجود ہے، مزید تجاویز آنی ہیں، اس بارے میں آئی سی سی کی ڈربن میں میٹنگ کے دوران جائزہ لیا جائے گا، تب دیگر معاملات زیر غور نہیں آئیں گے، میں یہ بات کہہ سکتا ہوں کہ ریونیو کی تقسیم کے حوالے سے ابھی بہت سی سنجیدہ نوعیت کی بحث ہونی ہے۔

یہ بھی پڑھیں: آئی سی سی کی آمدنی؛ بڑا بھارتی حصہ پاکستان کوایک آنکھ نہ بھایا

یاد رہے کہ مجوزہ فارمولے کے تحت انگلینڈ اور آسٹریلیا کو بھارت کے بعد سب سے زیادہ آمدنی حاصل ہو گی، بگ تھری سے ہٹ کر پاکستان کا حصہ سب سے بڑا ہے مگر بورڈ اس سے خوش نہیں ، میٹنگ میں منظوری نہ دینے کا اعلان پہلے ہی کیا جا چکا ہے۔