مشہور بی ٹی ایس گلوکار کو جان سے مار نے کی دھمکیاں ملنے لگیں
کیا لگتا ہے میں جنک کوک کو مار نہیں سکتا؟ جہاں میں کھانا بھیجتا ہوں وہیں اسے مار بھی سکتا ہوں
دنیا بھر میں مشہور کورین بینڈ بی ٹی ایس کے گلوکار جنک کوک کو جان سے مار دینے کی دھمکیاں ملنے لگیں۔
غیر ملکی میڈیا رپورٹ کے مطابق یہ گلوکار کو یہ دھمکیاں ایک ایسے شخص کی جانب سے دی جارہی ہیں جو جنک کوک کا دیوانہ مداح ہے اور روز انہیں ان کے گھر پر کھانا بھیجتا ہے۔
جنک کوک روزانہ کی بنیاد پر کھانا موصول ہونے پر اس مداح سے پریشان تھے اور انہوں نے ایک ٹی وی شو کے زریعے اسے کھانا بھیجنے سے منع کیا تھا اور قانونی کارروائی کرنے کے حوالے سے بھی آگاہ کیا تھا جس کے بعد مداح آپے سے باہر ہوگیا اور گلوکار کو کھانا وصول نہ کرنے پر جان سے مارنے کی دھمکیاں دینے لگا۔
ذہنی مریض معلوم ہونے والے اس مداح نے سوشل میڈیا پر گلوکار کے اس پیغام پر جواب دیتے ہوئے لکھا ہے کہ 'کیا لگتا ہے میں جنک کوک کو مار نہیں سکتا؟ جہاں میں کھانا بھیجتا ہوں وہیں اسے مار بھی سکتا ہوں کیونکہ مجھے اس کے گھر کا ایڈریس معلوم ہے۔'
بی ٹی ایس آرمی کے گلوکار جنک کوک کے دنیا بھر میں موجود مداحوں نے دھمکیاں دینے والے ملزم کے خلاف کارروائی اور حفاظتی اقدامات کرنے کا مطالبہ کیا ہے۔