ٹی وی چینلز اپنے طور پر عمران خان کی تقاریر نشر نہیں کررہے پیمرا

چئیرمین پی ٹی آئی کی تقاریر نشرکرنے سے کسی کو نہیں روکا، پیمرا کا لاہور ہائی کورٹ میں موقف

ویب ڈیسک May 23, 2023

عمران خان نے تقاریر نشر نہ کرنے پر لاہور ہائیکورٹ میں درخواست دائر کی ہے:فوٹو:فائل

پاکستان الیکٹرونک میڈیا ریگولیٹری اتھارٹی ( پیمرا) کا کہنا ہے کہ چئیرمین تحریک انصاف عمران خان کی تقاریر نشر کرنے سے کسی کو نہیں روکا۔

لاہور ہائی کورٹ میں عدالتی حکم کے باوجود پی ٹی آئی چئیرمین عمران خان کی تقاریر نشر کرنے پر پابندی کیخلاف درخواست کی سماعت ہوئی۔

پیمرا کی جانب سے عمران خان کی درخواست پر جمع کروائے گئے جواب میں کہا گیا کہ ٹی وی چینلز اپنے طور پر عمران خان کی تقاریر نشر نہیں کر رہے۔ کسی کو عمران خان کی تقاریر نشرکرنے سے نہیں روکا۔عدالت نے عمران خان کے وکیل کو پیمرا کے جواب کا جواب داخل کرانے کی ہدایت کر دی

عمران خان کی جانب سے عدالت میں دائر درخواست میں موقف اختیار کیا گیا تھا کہ لاہور ہائی کورٹ نے عمران خان کی تقاریر نشر کرنے پر پابندی کا نوٹفیکیشن معطل کردیا تھا۔ عدالتی احکامات کے باوجود چئیرمین پی ٹی آئی کی تقاریر کو نشر ہونے سے روکا جا رہا ہے۔ اس سلسلے میں عدالتی فیصلے پر عمل در آمد کروایا جائے۔