عمران خان بشریٰ بی بی سمیت 128 افراد کے نام نو فلائی لسٹ میں شامل
فواد چوہدری کی دونوں اہلیہ حبا فواد اور صائمہ فواد کا نام بھی لسٹ میں شامل ہے، ذرائع
اسلام آباد ایف آئی اے نے مربوط بارڈر مینجمنٹ سسٹم کے تحت تحریک انصاف کے 128 افراد کے نام باقاعدہ نو فلائی لسٹ میں ڈال دیے۔
تفصیلات کے مطابق تحریک انصاف کے چئیرمین تحریک انصاف عمران خان اور ان کی اہلیہ بشری بی بی، فواد چوہدری کی دونوں اہلیہ حبا فواد اور صائمہ فواد کا نام بھی لسٹ میں شامل ہے۔
علاوہ ازیں سابق وفاقی وزیر فخر امام ، نورالحق قادری، عمر ایوب خان، سابق ایم این ایز کنول شوزب، عون عباس، واثق قیوم، بابر عطا، محمد ہمایوں احمد، حاجی امتیاز احمد چوہدری اور دیگر کا نام بھی لسٹ میں شامل ہے۔
لسٹ کے مطابق تحریک انصاف کے 128 راہنماؤں اور کارکنوں کو لسٹ میں ڈالا گیا ہے۔ واضح رہے کہ پولیس، نیب اور انٹی کرپشن کے مراسلوں کےبعد نام نو فلائی لسٹ میں ڈالے گئے ہیں۔
ذرائع کے مطابق ون ٹائم پرمیشن کے لیے بھی ان لوگوں کو وزارت داخلہ سے اجازت لینی ہو گی، تمام افراد کی لسٹیں ایئرپورٹس پر امیگریشن حکام کو فراہم کردی گئیں ہیں۔