خود کو پولیس افسر ظاہر کرکے شہریوں سے رقم بٹورنے والی نوسرباز خاتون گرفتار
ملزمہ شہریوں کو نوکری کا جھانسہ دے کر رقم بٹورتی تھی، پولیس
راولپنڈی پولیس نے خود کو پولیس آفیسر ظاہر کرتے ہوئے سادہ لوح افراد کو محکمہ پولیس میں ملازمت دلانے کا جھانسہ دیکر رقم لوٹنے والی نو سرباز خاتون کو گرفتار کرلیا۔
حکام کے مطابق مسماتہ سونیا کے متعلق شہری نے پولیس ایمرجنسی 15 پر کال کرکے اطلاع دی کہ خاتون خود کو پولیس آفیسر ظاہر کرتی ہے اور محکمہ پولیس میں بھرتی کروانے کے لیے رقم لی ہے جس پر تھانہ سول لائن پولیس نے چھاپہ مار کر ملزمہ کو گرفتار کرلیا۔
متاثرہ شہری نے پولیس کو مزید بتایا کہ ملزمہ نے اس سے قبل بھی اسکی ممانی سے اس کے بیٹوں کو بھرتی کروانے کا جھانسہ دے کر رقم لی تھی۔
پولیس نے مقدمہ درج کر کے ملزمہ سے تفتیش کا آغاز کر دیا۔
ایس پی پوٹھوہار محمد وقاص خان کا کہنا تھا کہ گرفتار ملزمہ کو ٹھوس شواہد کے ساتھ چالان کرکے قرار واقعی سزا دلوائی جائے گی۔