آسٹریلیا میں باراتیوں کی بس کو حادثہ 10 ہلاک اور 25 زخمی

آسٹریلیا بس حادثہ ڈرائیور کی غفلت کے باعث پیش آیا؛ فوٹو: ٹوئٹر

---

آسٹریلوی ریاست نیو ساؤتھ ویلز میں شادی کی تقریب سے واپس آنے والی بس ایک چوراہے پر خوفناک حادثے کا شکار ہوگئی جس کے نتیجے میں 10 افراد ہلاک اور 25 زخمی ہوگئے۔

عالمی خبر رساں ادارے کے مطابق ریاست نیو ساؤتھ ویلز آسٹریلیا کی تاریخ کا بدترین ٹریفک حادثہ ہوا ہے جس میں ایک شادی کی تقریب سے واپس آنے والی بس تیز رفتاری کے باعث چوراہے پر موڑ کاٹتے ہوئے الٹ گئی۔

بس سڑک سے رگڑتی ہوئی دور ایک فٹ پاتھ سے بری طرح ٹکرائی جس سے اس کا اگلا حصہ مکمل طور پر تباہ ہوگیا اور مسافر بری طرح زخمی ہوگئے۔ زخمیوں کو ایمبولینس کے ذریعے اسپتال منتقل کیا۔

پولیس نے 58 سالہ ڈرائیور کو گرفتار کرلیا ہے جس کے بارے میں شُبہ ہے کہ وہ نشے کی حالت میں بس چلا رہا تھا۔ ڈرائیور کے نشے کی جانچ کے لیے ٹیسٹ کریا گیا جب کہ اس کی ضمانت کی درخواست مستر کردی گئی۔

حادثے میں 10 مسافروں کے ہلاک ہونے کی تصدیق ہوگئی جن میں بچے اور خواتین بھی شامل ہیں جب کہ 25 دیگر افراد زخمی ہیں جن میں سے 7 کو انتہائی نگہداشت کے وارڈ میں رکھا گیا ہے۔ ہلاکتوں میں اضافے کا خدشہ ہے۔