چئیرمین پی ٹی آئی نے جے آئی ٹی میں فوجی افسران پرالزام کی ویڈیو کو تسلیم کرلیا

جنرل فیصل کو ڈرٹی ہیری کہتا ہوں، چئیرمین پی ٹی آئی

ویب ڈیسک June 13, 2023

جے آئی ٹی کی کارروائی قلم بند کی گئی اور چئیرمین پی ٹی آئی کے دستخط لیے گئے:فوٹو:فائل

تحریک انصاف کے چئیرمین نے جے آئی ٹی کے سامنے اعلی فوجی افسران کیخلاف اپنے سنگین الزامات والے ویڈیو کلپس کوتسلیم کرلیا۔

ذرائع کے مطابق چئیرمین پی ٹی آئی کو اعلیٰ فوجی افسران پر ان کی جانب سے عائد الزامات پر مبنی ایف آئی آر بتائی گئی۔جے آئی ٹی نے چئیرمین پی ٹی آئی سے استفسار کیا کہ کیا ان کے پاس ویڈیو کلپس میں لگائے گئے الزامات کا کوئی ثبوت ہے جس پر چئیرمین تحریک انصاف نے کہا کہ ان کے پاس کوئی ثبوت نہیں۔

چئیرمین پی ٹی آئی سے سوال کیا گیا کہ کیا جنرل فیصل نے آپ کو براہ راست دھمکی دی تو انہوں نے کہا کہ مجھے کوئی دھمکی نہیں دی گئی۔ذرائع کے مطابق جب پی ٹی آئی چئیرمین سے پوچھا گیا کہ پھر آپ نے الزامات کیوں لگائے تو انہوں نے کہا کہ مجھے کسی نے بتایا تھا۔ میرے پاس اس کا کوئی ثبوت یا گواہ موجود نہیں۔

جے آئی ٹی نے استفسار کیا کہ پھر آپ نے ڈی جی آئی کا نام کیوں لیا؟ کیا آپ کی جنرل فیصل سے ملاقات ہوئی؟ آپ کس کو ڈرٹی ہیری کہتے ہیں؟چئیرمین پی ٹی آئی نے جواب دیا کہ کہ ڈی جی آئی نے پریس کانفرنس کی تھی۔ جنرل فیصل سے ملاقات نہیں ہوئی۔ جنرل فیصل کو ڈرٹی ہیری کہتا ہوں۔

چئیرمین پی ٹی آئی نے جے آئی ٹی سے کہا کہ اپنے تما م کلپس کو مانتا ہوں اب جانا چاہتا ہوں۔ جے آئی ٹی کی تمام کارروائی دستاویزی طور پر قلم بند کی گئی جس پر چئیرمین پی ٹی آئی کے دستخط بھی لیے گئے۔