طوفان کا خطرہ کراچی میں انٹرمیڈیٹ بورڈ اور یونیورسٹیز کے امتحانات ملتوی
انٹرمیڈیٹ کے 14 اور پندرہ جون کو ہونے والے امتحانات ملتوی کردیے گئے
شہر قائد میں ممکنہ سمندری طوفان اور بارشوں کے پیش نظر انٹرمیڈیٹ کے امتحانات اور جامعہ کراچی کو بند رکھنے کا اعلان کردیا گیا ہے۔
کمشنر کراچی کی جانب سے طوفان اور بارشوں کے پیش نظر شہر قائد میں تمام تعلیمی سرگرمیاں، سمر کیمپ اور سینیمنارز ملتوی کرنے کا نوٹی فکیشن جاری کیا گیا جس پر اعلیٰ ثانوی تعلیمی بورڈ کراچی نے چودہ اور پندہ جون کو ہونے والے امتحانات ملتوی کردیے۔
بورڈ انتظامیہ کے مطابق 14 جون بروز بدھ اور 15 جون بروز جمعرات کو ملتوی ہونے والے پرچوں کی تاریخ کا اعلان بعد میں کیا جائے گا۔
مزید پڑھیں: سمندری طوفان کا کراچی سے فاصلہ مزید کم، شہر میں مٹی کا طوفان
اُدھر جامعہ کراچی کی انتظامیہ نے بھی یونیورسٹی میں 14 جون کو تمام شعبہ جات بند رکھنے اور ہر قسم کی تعلیمی سرگرمیاں معطل کرنے کا اعلان کردیا۔
ترجمان جامعہ کراچی کے مطابق سمندری طوفان کے ممکنہ اثرات کے پیش نظر جامعہ کراچی میں بدھ کو تدریسی عمل معطل رہے گا جبکہ چودہ جون ہونے ہونے والے تمام امتحانات بھی ملتوی کردیے گئے ہیں۔
ڈاؤ یونیورسٹی کے امتحانات ملتوی
دوسری جانب ڈاؤیونیورسٹی آف ہیلتھ سائنسز نے بھی 14جون کوصبح اور شام میں منعقد ہونے والے امتحانات ملتوی کردئیے۔ ناظم امتحانات ڈاکٹر فواد شیخ کی جانب سے جاری اعلامیہ کےمطابق فیصلے کا اطلاق ڈاؤ میڈیکل کالج اور اطلاق ڈاؤ انٹرنیشنل میڈیکل کالج اوجھا کیمپس دونوں پر ہوگاجبکہ ملتوی شدہ امتحانات کی نئی تاریخوں کا اعلان بعد میں کردیا جائے گا۔ انہوں نے طلبا کو ہدایت کی کہ وہ مزید معلومات کےلیے یونیورسٹی کی ویب سائٹ سے رجوع کریں۔
وفاقی تعلیمی ادارے کے امتحانات بھی ملتوی
فیڈرل بورڈ آف انٹرمیڈیٹ اینڈ سیکنڈری ایجوکیشن اسلام آباد نے بھی کراچی میں 14 اور 15 جون کو ہونے والے انٹرمیڈیٹ کے امتحانات ملتوی کردیے۔