پاکستان کے بغیر ایشیاکپ کا انعقاد ٹاپنگ کے بغیر پیزا جیسا ہے بھارتی کمنٹیٹر

آکاش چوپڑا کا بیان ایشیاکپ کیلئے پی سی بی کے ہائبرڈ ماڈل کو منظوری ملنے کے بعد آیا ہے

ویب ڈیسک June 17, 2023

آکاش چوپڑا کا بیان ایشیاکپ کیلئے پی سی بی کے ہائبرڈ ماڈل کو منظوری ملنے کے بعد آیا ہے (فوٹو:ایکسپریس ویب)

سابق بھارتی کرکٹر و کمنٹیٹر آکاش چوپڑا کا کہنا ہے کہ پاکستان کے بغیر ایشیاکپ کا انعقاد 'ٹاپنگ کے بغیر پیزا' جیسا ہے۔

یوٹیوب چینل پر سابق بھارتی کرکٹر آکاش چوپڑا نے کہا کہ ایشیاکپ کے ہائبرڈ ماڈل منظور ہونے اور ورلڈکپ 2023 میں پاکستان کے بھارت آکر کھیلنے کے فیصلے پر بلکل حیران نہیں ہوں کیونکہ آئی سی سی ایونٹس کو آپ منع نہیں کرسکتے۔

انہوں نے کہا کہ ورلڈکپ سے قبل پاکستان ایشیاکپ نہ کھیلنے کا فیصلہ کرسکتا تھا اور دوسری ٹیمیں چاہیں تو گرین شرٹس کے بغیر کھیل لیں لیکن ایشیاکپ پاکستان کے بغیر ہونا ایسا ہوتا جیسا 'ٹاپنگ کے بغیر پیزا'، اس ایونٹ کو کوئی نہیں دیکھتا۔

مزید پڑھیں: ''پاکستان، بھارت کے میچز ورلڈ ٹیسٹ چیمپئین شپ میں کیوں نہیں ہیں''

سابق کرکٹر کا بیان ایشیاکپ کیلئے پی سی بی کے ہائبرڈ ماڈل کو ایشین کرکٹ کونسل (اے سی سی) کی جانب سے باضابطہ منظوری ملنے کے بعد آیا ہے۔

مزید پڑھیں: لکھ لیں! پاکستان ورلڈکپ کیلئے آئے گا لیکن بھارت وہاں نہیں جائے گا، آکاش چوپڑا

ٹورنامنٹ، جو 31 اگست سے 17 ستمبر کے درمیان کھیلا جائے گا، پاکستان میں 4 میچ کھیلے جائیں گے جبکہ فائنل سمیت 9 میچز سری لنکا میں کھلیں جائیں گے۔ بھارت، پاکستان، سری لنکا، بنگلہ دیش، افغانستان اور نیپال سمیت کل چھ ٹیمیں کل 13 ون ڈے میچوں میں حصہ لیں گی۔

قبل ازیں بھارتی کرکٹ بورڈ (بی سی سی آئی) نے سیکیورٹی مسائل کا حوالہ دیتے ہوئے ہندوستانی ٹیم کو ٹورنامنٹ کیلئے پاکستان جانے کی اجازت دینے سے انکار کردیا تھا۔