جامعہ کراچی نے پی ایچ ڈی اسکالرشپ50ہزار کردی

ایم فل اور پی ایچ ڈی کے طلبا کو اسکالرشپ دی جاتی ہے ،آئی سی سی بی ایس

Staff Reporter June 22, 2023

جامعہ کراچی نے ایم فل اور پی ایچ ڈی پروگرام میں داخلوں کا اعلان کردیا ۔ فوٹو : فائل

بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی نے ایم فل اور پی ایچ ڈی پروگرام میں داخلوں کا اعلان کردیا۔

آئی سی سی بی ایس، جامعہ کراچی نے پی ایچ ڈی کی اسکالرشپ35ہزار سے بڑھاکر50ہزار روپے کردی،ملک میں یہ واحد ادارہ ہے جو ایم فل اور پی ایچ ڈی پروگرام میں داخلہ لینے والے تمام طالب علموں کو اسکالرشپ دیتا ہے،آئی سی سی بی ایس جامعہ کراچی کے ترجمان کے مطابق6ہزار روپے فیس برائے داخلہ کارروائی سندھ بینک کی کسی بھی برانچ میں جمع کرائی جاسکتی ہے۔

متعلقہ رقم ناقابل واپسی ہوگی، داخلہ درخواستیں (اسکین کاپی) بشمول تمام ضروری کاغذات اور فیس ڈپازٹ سلپ 5 جولائی تک جامعہ کراچی کے ایڈمیشن پورٹل پر آن لائن جمع کروائی جاسکتی ہیں، کامیاب امیدواروں کو ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی) جامعہ کراچی اور ایچ ای جے ریسرچ انسٹی ٹیوٹ آف کیمسٹری میں داخلہ دیا جائیگا۔

اْمیدوار نامیاتی کیمیا، تجزیاتی کیمیا ، طبعیاتی کیمیا ، غیر نامیاتی کیمیا ، حیاتی نامیاتی کیمیا ، ٹیکسٹائل کیمسٹری، فارماکولوجی اور مالیکیولر میڈیسن بشمول مالیکیولر اینڈ سیلولر حیاتیات، مالیکیولر جینیٹکس، مالیکیولر فارماکولوجی اور دیگر شعبوں میں داخلے ملیں گے ۔