پیرس میں وزیراعظم شہباز شریف کی سعودی ولی عہد سے ملاقات
وزیراعظم نے آئی ایم ایف کی میجنگ ڈائریکٹر، فرانسیسی صدر ، یو این سیکریٹری جنرل سمیت دیگر حکام سے بھی ملاقاتیں کیں
نئے عالمی مالیاتی معاہدے سے متعلق سربراہی اجلاس کے موقع پر وزیراعظم شہباز شریف کی سعودی عرب کے وزیراعظم اور ولی عہد شہزادہ محمد بن سلمان سے ملاقات ہوئی ہے۔
ایکسپریس نیوز کے مطابق ملاقات میں وزیراعظم شہباز شریف نے سعودی فرمانروا شاہ سلمان بن عبد العزیز کے لیے نیک تمناؤں کا اظہار کیا۔
ملاقات میں شہزادہ محمد بن سلمان نے بھی وزیراعظم سے پاکستان کی حکومت اور عوام کے لیے خیرسگالی کے جذبات کا اظہار کیا۔
اس موقع پر دونوں راہنماؤں نے باہمی دلچسپی کے امور پر تبادلہ خیال کرتے ہوئے دوطرفہ تعاون کے فروغ کے لیے اشتراکی عمل مزید بڑھانے پر اتفاق کیا۔
وزیراعظم نے فرانس میں آئی ایم ایف کی میجنگ ڈائریکٹر، فرانسیسی صدر میکرون، اقوام متحدہ کے سیکریٹری جرنل انتونیو گوتریس سمیت دیگر حکام سے بھی ملاقاتیں کیں اور اہم امور پر تبادلۂ خیال کیا۔