برآمد کنندگان نے انکم آرڈیننس میں 99 ڈی کی نئی شق مسترد کردی

مجوزہ شق پر عمل درآمد سے صنعتیں بیرون ملک منتقلی پر مجبور ہو جائیں گی، جاوید بلوانی

Ehtisham Mufti June 23, 2023

مجوزہ شق پر عمل درآمد سے صنعتیں بیرون ملک منتقلی پر مجبور ہو جائیں گی، جاوید بلوانی۔ فوٹو: نیٹ

برآمدکنندگان نے انکم آرڈیننس میں99ڈی کی نئی شق کی شمولیت کو مسترد کرتے ہوئے حکومت کو متنبہ کیا ہے کہ مجوزہ شق پر عملدرآمد ملک سے سرمائے کے پرواز کا باعث بنے گا اور مقامی صنعتیں بیرون ملک منتقلی پر مجبور ہوجائیں گی۔

پاکستان اپیرل فورم کے چئیرمین جاوید بلوانی نے بتایا کہ مجوزہ نئی شق پر عمل درآمد کی صورت میں وہ تاجر وصنعتکار جو باقاعدگی سے ٹیکسوں کی ادائیگیاں کررہے پر گزشتہ 5سال کے دوران کسی بھی وجہ سے ان کی بڑھی ہوئی آمدنی یا منافع پر اضافی ٹیکس عائد کردیا جائے گا، حکومت کے اس غیردانشمندانہ اقدام سے برآمدکنندگان سمیت دیگر تجارت وصنعتی حلقوں میں شدید اضطراب پایا جارہا ہے۔

یہ بھی پڑھیں: سپریم کورٹ نے 20 فیصد رئیل اسٹیٹ انکم ٹیکس پر عبوری ریلیف دیدیا

جاوید بلوانی نے کہا کہ مقامی برآمدی صنعتوں کو ڈی ایل ٹی ایل کی عدم ادائیگیوں کے باوجود نئے مالی سال میں بھی سپر ٹیکس کی وصولیوں کو برقرار رکھا گیا ہے حالانکہ حکومت نے سپر ٹیکس کے نفاذ کو صرف ایک سال تک رکھنے کا اعلان کیا تھا، رواں سال بھی سپر ٹیکس کے نفاذ سے برآمدی صنعتوں کے مالیاتی مزید بڑھ گئے ہیں۔

انھوں نے حکومت سے مطالبہ کیا کہ وہ انکم ٹیکس کی نئی شق پر عمل درآمد روک دے بصورت دیگر ویلیوایڈڈ سمیت دیگر شعبوں کی برآمدات پر انتہائی مہلک اثرات مرتب ہوں گے۔