سلیمان ’فادرڈے‘ کو یاد گار بنانے کیلیے والد کے ہمراہ آبدوز پر گیا تھا پھوپھی

ٹائٹن آبدوز 18 جون کو سفر پر روانہ ہوئی تھی اور پونے 2 گھنٹے بعد ہی رابطہ منقطع ہوگیا تھا

ویب ڈیسک June 23, 2023

سمندر میں دھماکے سے پھٹنے والی آبدوز میں پاکستانی تاجر شہزادہ داؤد اور ان کے بیٹے سلیمان بھی موجود تھے؛ فوٹو: فائل

داؤد فیملی کا کہنا ہے کہ 19 سالہ سلیمان ٹائی ٹینک کی باقیات دیکھنے کے سفر سے خوفزدہ تھے لیکن والد شہزادہ داؤد کو خوش کرنے کے لیے فادر ڈے پر اس سفر پر جانے کو تیار ہوئے۔

ٹائٹن آبدوز میں ٹائی ٹینک کی باقیات دیکھنے جانے والے شہزادہ داؤد کی بڑی بہن عزم داؤد نے انکشاف کیا ہے کہ ان کا بھانجا سلیمان داؤد اس سفر سے خوف زدہ تھا لیکن فادرز ڈے پر والد کو خوش کرنے کی خاطر راضی ہوگیا تھا۔

سلیمان داؤد اسکاٹ لینڈ کی یونیورسٹی میں تعلیم حاصل کر رہے تھے۔ یونیورسٹی کے اساتذہ اور ساتھی طلبا ناگہانی حادثے میں سلیمان داؤد کے انتقال کرجانے پر افسردہ ہیں اور اہل خانہ سے اپنے غم و دکھ کا اظہار کیا ہے۔

یہ بھی پڑھیں : لاپتا آبدوز ٹائٹن میں موجود پاکستانی تاجر شہزادہ داؤد کون ہیں؟

آبدوز کی تلاش کے دوران شہزادہ داؤد کی اہلیہ اور بیٹی ریسکیو مقام پر موجود رہیں۔

لاپتہ آبدوز کا ملبہ ٹائی ٹینک جہاز کے قریب سے ملا ہے، امریکی کوسٹ گارڈ#expressnews #breakingnews #submarine #OceanGate pic.twitter.com/cGFJ7Qk4bI
— Express News (@ExpressNewsPK) June 22, 2023

قبل ازیں حسین اینڈ کلثوم داؤد فیملی نے بھی اپنے پیاروں کی حادثے میں انتقال کرجانے کی تصدیق کرتے ہوئے کہا کہ ہمارے پیارے بچے سمندر میں حادثے کا شکار ہوجانے والی آبدوز میں موجود تھے۔ ہم ٹائٹین آبدوز میں موجود دیگر مسافروں کے خاندانوں سے بھی اظہار افسوس کرتے ہیں۔

یہ خبر بھی پڑھیں : لاپتا آبدوز کے نقائص پر5 سال قبل آواز اُٹھانے والے ڈائریکٹر کو نوکری سے نکال دیا گیا تھا

بیان میں مزید کہا گیا ہے کہ ہمارے پیاروں کی تعزیت کرنے، ریسکیو آپریشن میں حصہ لینے اور اہل خانہ کے ساتھ اس مشکل وقت میں کھڑے رہنے والے ایک ایک فرد کا شکریہ ادا کرتے ہیں۔