سمندر کی گہرائیوں سے آبدوز ٹائٹن کا ملبہ نکال لیا گیا

ٹائی ٹینک کا ملبہ دیکھنے کیلیے جانے والی آبدوز ٹائٹن 18 جون کو حادثے کا شکار ہوگئی تھی

ویب ڈیسک June 29, 2023

ٹائی ٹینک کے ملبے کو دیکھنے کیلیے جانے والی آبدوز 18 جون کو تباہ ہوئی تھی؛ فوٹو: فائل

ٹائی ٹینک کا ملبہ دیکھنے بحراوقیانوس میں کی گہرائیوں میں جانے والی آبدوز ٹائٹن غرقاب ہوگئی تھی جس کی باقیات کو نکال لیا گیا۔

عالمی خبر رساں ادارے کے مطابق ٹائٹن آبدوز بحراوقیانوس میں حادثے کا شکار ہوکر تباہ کوگئی تھی اور اس میں موجود پانچوں سیاحوں میں سے کوئی بھی نہیں بچا تھا۔ ان افراد میں سے 2 پاکستانی باپ بیٹے بھی تھے۔

حادثے کے دس روز بعد ٹائٹن آبدوز کے ملبے کو سمندر کی تہہ سے نکال کر کینیڈا لایا گیا۔ اب اس ملبے پر تحقیقات کی جائیں گی اور حادثے کی اصل وجہ اور وقت کا تعین کیا جائے گا۔

ماہرین کا دعویٰ ہے کہ اس تحقیقات سے حیران کن انکشافات سامنے آنے کا امکان ہے جس کی مدد سے آبدوز ٹیکنالوجی کی خامیوں کو دور کرنے میں مدد ملے گی اور ٹائی ٹینک کے ملبے کو دیکھنے کے سفر کو محفوظ بنایا جاسکے گا۔

اب تک دستیاب معلومات کے مطابق 18 جون کو 100 سال قبل ڈوبنے والے عظیم بحری جہاز ٹائی ٹینک کی باقیات کو دیکھنے کے لیے جانے والی اوشین گیٹ کی ٹائٹن آبدوز سفر کے آغاز کے دو گھنٹے بعد ہی حادثے کا شکار ہوگئی تھی۔

یہ حادثہ ممکنہ طور پر کم دباؤ کی وجہ سے آبدوز کا پھٹ جانا ہوسکتا ہے لیکن یہ امکان ہی ہے۔ اصل صورت حال آبدوز کے ملبے کی جانچ پڑتال کے بعد ہی سامنے آسکے گی جس کا پوری دنیا کو بے تابی سے انتظار ہے۔

اس مہنگے ترین سیاحتی دورے میں اوشین گیٹ کے سی ای او سمیت پاکستانی بزنس مین شہزادہ داؤد، ان کے بیٹے سلیمان اور دو مزید غیر ملکی تاجر موجود تھے۔ لواحقین کا کہنا ہے کہ وہ جاننا چاہتے ہیں ان کے پیاروں کے ساتھ یہ حادثہ کیسے پیش آیا تھا۔